كەشە قالىڭ قازاق ازا تۇتتى.
بۇگىن جەر استىندا كوز جۇمعان كەنشىلەردى جەرلەۋ باستالدى. مارقۇمداردى جەرلەۋ ءۇش كۇنگە سوزىلادى.
قارا جامىلعان قاراعاندى حالقىمەن بىرگە ەلدىڭ مۇڭىن جۇرەگىنەن وتكىزەتىن اقىندار دا قايعىرىپ، ازا جىرلارىن ارنادى.
عالىم جايلىباي
قاراعاندى...
قاسىرەت جىرى
تۋلاق ساباپ جاتقانداي
تاسقا اۋناتىپ،
قاراعاندى كوگىنەن قاشقان باقىت...
...شەرۋباي-نۇرا «شەرمەندە» كۇيىن شالدى –
سوقىر وزەن كوزىنەن جاس پارلاتىپ.
ساعىم الىپ قاشقانداي سامالاڭدى،
قۋ تاقىرعا شوگەردىڭ قارا ناردى.
زارلاپ كوشكەن جۇرت ەدىڭ،
«كارلاگ» كەشكەن –
ساعان ەندى نە دەيىن، قاراعاندى؟
قازان تاڭى،
قايعىمنىڭ قوزعاپ ءبارىن،
اققۋدى اتتىڭ،
ەي، اجال،
قازدى اتپادىڭ.
– كومىر بەرەم – دەپ ءجۇرىپ
ءومىر بەرگەن –
باقۇلداسپاي قايتەمىن، بوزداقتارىم!
سامالى ارلى، سارىارقا،
ساناڭ ارلى،
گەپتيل جاۋىپ قۇرداستىڭ قانى اعاردى...
جانارىڭنان تاعى دا جاس ساۋلادى –
قاباعىڭنان قار جاۋعان، قاراعاندى!
تەرەڭىمە تەربەلگەن باتتى ۋايىم،
قاناتىڭدى قارعام-اي،
قاقتىرايىن.
...اق ورداڭنىڭ ىشىنە جىبەك جايىپ –
كۇمىس ساپتى وجاۋمەن اق قۇيايىن.
جايلاۋىنداي جانىڭنىڭ جاز الەمى،
نازى ادەمى جۇرت ەدىڭ،
سازى ادەمى.
...قارالى تۋ كوتەرگەن، قاراعاندى –
بىرگە بۇگىن وزىڭمەن، قازاق ەلى!
قايرات اسقار
كيەسى قاشتى ما جات وزعان ءتورىڭنىڭ...
شاحتا ما - مەكەنى قازىلار كورىڭنىڭ؟
ازاپ پا ەڭبەگىڭ، جوق الدە توزاق پا -
تىرىدەي ورتەنىپ، تىرىدەي كومىلدىڭ.
ولكەم بار وتە باي، نەگە ءوزىم كەدەيمىن؟..
وزەگىم ورتەنگەن، وكسىگەن وگەيمىن.
سەن ەندى ۇيىڭە جارقىلداپ قايتپايسىڭ،
جاۋتاڭكوز جارىڭا، بالاڭا نە دەيمىن؟!.
ىنساپسىز كەلىمسەك ىقتيار، ىرقىن اپ،
كەندى ولكەڭ - ازالى، ساي-سۇيەك سىرقىراپ.
جاپ-جارىق الەمدى ءبىر كورگىڭ كەلدى مە
شىڭىراۋ تەرەڭدە شىبىن جان شىرقىراپ؟
بولساڭ دا بيىككە، اسپانعا تىم قۇشتار،
قارا جەر جىبەرمەس قاھارلى ءبىر كۇش بار...
قازادى قاشانعى تىرىدەي كورىڭدى
كۇناھار قولدارمەن جاسالعان قىلمىستار؟!.
ميراس اسان
ازا جىرى
ازا تۇتامىن اڭىراپ،
قارا جامىلام قاڭىراپ.
وپىرىلىپ تۇسكەن شاحتا ەمەس –
45 قارا شاڭىراق.
ازا تۇتامىن ازاپتا،
تۇسكەن جوق جانىم از وتقا.
پايدالى قازبا دەگەندەر،
پايداسىز بوپ تۇر قازاققا...
اشكەرە بولدى كوپ كەمىم،
جۇرەگىم –جالىن، وت – دەمىم.
قارا جامىلعان كوك تۋعا،
قاراۋعا ءداتىم جوق مەنىڭ!
تايعاقپەن ءجۇردىم، جول تۇرىپ،
وعلاندارىمدى ءولتىرىپ...
قازىلعان كومىر ورىنىن،
قازامەن جاپتىم تولتىرىپ!
ازا تۇتامىن، حاق كورسە،
كەگىمدى كەتكەن اپ بەرسە.
ماقتاۋدان وڭاي نارسە جوق،
جوقتاۋدان قيىن جوق نارسە.
سورامدى ۋ عىپ جۇتامىن،
قاۋسادىم،
شوكتىم،
جۇتادىم.
مەن ەندى ولەڭ جازبايمىن،
مەن ەندى ازا تۇتامىن...
جانات جانقاش
قارا جەردىڭ استىندا،
قۇرباندار كومىر قازىپ جاتادى،
جەر بەتىندەگى بىلشىلمەن جوق مۇلدە شاتاعى.
ءۇن-تۇنسىز، توقتاۋسىز بۇرعىلاپ،
ءۇن-تۇنسىز تۇنجىرىپ،
كەتكەندەي تاعدىردىڭ تاتاۋى.
قۇرباندار، جەر قازىپ جاتادى، بۇرعىلاپ،
ماڭگىگە سونبەيتىن بەينەدەي بۇل ءبىراق.
جەر استىندا بىرەۋلەر ءۇن-تۇنسىز جۇرەدى،
جەردىڭ تامىرىنا قاتقان قاندى ۇرعىلاپ.
جەر استىنا كۇن الىپ شىعۋعا كىرگەندەر…
قۇرباندار سۇيەگىمەن شەگەندەپ، بەكىتەدى ىرگەڭدى ەل.
كومىردىڭ قىپ-قىزىل وتىنا قىزىعا قارايتىن ادامدار،
بۇل الاۋ – قۇربانداردىڭ قانى ەكەنىن ۇمىتىپ كەتىپ جۇرمەڭدەر.
قۇرباندار جەر قازىپ، جاتادى…