پايدالانىلماي جاتقان 10 ملن گەكتار جەر مەملەكەتكە قايتارىلادى. بۇل تۋرالى ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«جەر ماسەلەسىنە كەلەتىن بولساق، بۇگىنگى تاڭدا مەملەكەتكە 2،9 ملن گەكتار پايدالانىلمايتىن جەر قايتارىلدى جانە جىل سوڭىنا دەيىن 5 ملن گەكتارعا جەتكىزىلەدى. كەلەسى جىلدىڭ سوڭىنا دەيىن قوسىمشا تاعى 5 ملن گەكتار پايدالانىلمايتىن جانە زاڭنامانى بۇزا وتىرىپ بەرىلگەن اۋىل شارۋاشىلىعى جەرلەرى بويىنشا ناقتى شەشىمدەر قابىلداناتىن بولادى»، - دەدى ەربول قاراشوكەيەۆ.
وسى رەتتە ءمينيستردىڭ ايتۋىنشا، مۇنداي كولەمدى جۇمىستى ورىنداۋ ءۇشىن قوسىمشا 200 شتات بىرلىگىن بولە وتىرىپ، جەر ينسپەكسياسىن نىعايتۋ كەرەكتىگىنە نازار اۋدارتتى.
«سونداي-اق اۋدان اكىمدەرى جانە جەر قاتىناستارىنا جەتەكشىلىك ەتەتىن وبلىس اكىمدىكتەرىنىڭ ورىنباسارلارى جالعا بەرىلگەن جەرلەردى انىقتاۋ بويىنشا مونيتورينگتى جۇزەگە اسىرۋ فۋنكسيالارىن تيىسىنشە ورىنداماعان جاعدايدا، ولاردىڭ جاۋاپكەرشىلىگىن كۇشەيتۋ قاجەت دەپ سانايمىن»، - دەدى ول.