الماتى قالاسىنىڭ №7 قالالىق كلينيكالىق اۋرۋحاناسىنىڭ دارىگەرلەرى جاعدايى ءۇمىتسىز بولىپ كورىنگەن ناۋقاستىڭ ءومىرىن ساقتاپ قالدى. ءيا، ونىڭ امان قالۋىنا كۇمان كوپ بولعان ەدى.
جەتپىس جاسقا تاياعان زەينەتكەر كلينيكالىق اۋرۋحاناعا وتە اۋىر جاعدايدا تۇسكەن. ماكروگەماتۋريا (زاردە قاننىڭ پايدا بولۋى) – قۋىق استى بەزىنىڭ قاتەرسىز گيپەرپلازياسىنان تۋىنداعان، اسقازاننىڭ ءجىتى ويىق جاراسىنان اسقىنعان، بۇرىن ميوكارد ينفاركتىسى بولعان، كورونارلىق جانە ءبۇيىر ارتەريالارىن ستەنتتەۋدەن كەيىنگى جاعداي، 2-3 دارەجەلى سەمىزدىك جانە ورتاشا اۋىر نىسانداعى گەمورراگيالىق تەمىر تاپشىلىعىنان تۋىنداعان انەميا.
سونداي-اق، بىلتىرعى ناۋرىزدا جۇرەك ىرعاعىنىڭ بۇزىلۋىنا بايلانىستى كارديوستيمۋلياتور ورناتىلعان. سوندىقتان ناۋقاستى ەمدەۋ قيىنعا سوققان، ىلەسپە اۋرۋلارى دارىگەرلەردى تىعىرىققا تىرەگەن.
بىلىكتى ماماندار كەڭەسە كەلە، ناۋقاستىڭ ءومىرىن قالايدا ساقتاپ قالۋ ءۇشىن «قۋىق استى بەزىنىڭ گيپەرپلاستيكالىق تۇيىندەرىن رەزەكسيالاۋ جانە قۋىق استى بەزىنىڭ قان كەتەتىن تامىرلارىن ەلەكتروكواگۋلياسيالاۋ» وتاسىن جاساۋ تۋرالى شەشىم قابىلدادى.
«پاسيەنتتىڭ جاقىن تۋىستارىمەن ەمدەۋ ءادىسى دە تالقىلاندى. وپەراسيا كەزىندە قۋىقتا ەلەكتروحيرۋرگيا كومەگىمەن الىپ تاستالعان كىشكەنتاي ىسىك تابىلدى. كەيىننەن گيستولوگيالىق زەرتتەۋ قاتەرلى ناتيجە كورسەتەدى. ارينە، قۋىقتىڭ قاتەرلى ىسىگى – بۇل ءقاۋىپتى اۋرۋ، ول كەيىننەن قايتادان قان كەتۋگە جانە پاسيەنتتىڭ ولىمىنە الىپ كەلۋى مۇمكىن. ءبىراق زەرتتەۋ بارىسىندا قۋىقتىڭ بۇلشىق ەت قاباتىندا ىسىكتىڭ وسپەگەنى انىقتالدى، بۇل بىزگە پاسيەنتتىڭ قۋىق وبىرىنان تولىق ەمدەلەتىنىنە ءۇمىت بەرەدى»، – دەيدى №7 قالالىق كلينيكالىق اۋرۋحانانىڭ ەمدەۋشى ۋرولوگ-دارىگەرى رۋسلان ءجۇمادىلوۆ.
وپەراسيادان كەيىنگى كونسەرۆاتيۆتى تەراپيا ناتيجەسىندە پاسيەنت قاناعاتتانارلىق جاعدايدا شىعارىلدى.
وسى ورايدا زاماناۋي تەحنولوگيالاردىڭ كومەگىمەن، دارىگەرلەردىڭ كاسىبي شەبەرلىگىنىڭ، جانكەشتى ەڭبەگىنىڭ ارقاسىندا وسىنداي كۇردەلى جاعدايلاردا تالاي وتانداسىمىزدىڭ اجال اۋزىنان امان قالىپ جۇرگەنىن ايتا كەتەيىك.