گاستاربايتەرلەرگە قۇرىلىس الاڭىندا جۇمىس ىستەگەنى ءۇشىن جاقسى جالاقى تولەيتىنى ۇناعان.
قالا اۋماعىندا رەسپۋبليكالىق «ميگرانت» جەدەل-الدىن الۋ ءىس-شاراسى ءوتىپ جاتىر. ونىڭ بارىسىندا جاروكوۆ كوشەسىندەگى جاڭا تۇرعىن ءۇي كەشەنى شەتەلدىك جۇمىس كۇشىمەن سالىنعانى بەلگىلى بولعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل دەرەكتى ءبىز 20 اقپاندا باستالعان “ميگرانت” رەسپۋبليكالىق ءىس-شاراسى بارىسىندا انىقتادىق. جاقىندا قۇرىلىس نىساندارىنىڭ بىرىندە جۇرگىزىلگەن تەكسەرۋ كەزىندە زاڭسىز جۇمىس ىستەگەن وزبەكستاننىڭ 19 ازاماتى انىقتالدى: ولاردىڭ كەيبىرەۋلەرى ءبىر ايدان استام ۋاقىت بۇرىن، كەيبىرەۋلەرى وسى قۇرىلىس نىسانىنا 10 كۇن بۇرىن كەلگەن. ەڭ الدىمەن، قازاقستان رەسپۋبليكاسىنىڭ كوشى-قون زاڭناماسىن ورەسكەل بۇزعان شەتەلدىكتەردىڭ وزدەرى دە، ولاردىڭ جۇمىس بەرۋشىلەرى دە جاۋاپكەرشىلىككە تارتىلدى. سونىمەن قاتار ۇستالعانداردىڭ جەكە باسىنىڭ زاڭسىز ارەكەتتەرگە قاتىسى بار-جوعى تەكسەرىلەتىن بولادى. اكىمشىلىك ءىس ماتەريالدارى سوتقا جولدانادى»، — دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
«ميگرانت» جەدەل-الدىن الۋ ءىس-شاراسىنىڭ ماقساتى – ءتيىستى قوعامدىق ءتارتىپتى ساقتاۋ، شەتەلدىكتەردىڭ قازاقستان رەسپۋبليكاسىندا بولۋ ەرەجەلەرىن بۇزۋ دەرەكتەرىن انىقتاۋ.
«ءىس-شارانىڭ ءۇش كۇنىندە كوشى-قون زاڭناماسىن بۇزعانى ءۇشىن 536 ادام اكىمشىلىك جاۋاپكەرشىلىككە تارتىلدى، 44 شەتەلدىك قازاقستاننان شىعارىلدى. سونىمەن قاتار شەتەلدىكتەردىڭ قازاقستان رەسپۋبليكاسىندا بولۋىنىڭ زاڭدىلىعىن قامتاماسىز ەتۋ شارالارىن قولدانباعانى ءۇشىن 224 قابىلداۋشى تاراپ جاۋاپكەرشىلىككە تارتىلسا، ق ر شەتەلدىك جۇمىس كۇشىن تارتۋ ەرەجەلەرىن بۇزعانى ءۇشىن 24 جۇمىس بەرۋشىگە ايىپپۇل سالىندى. سونداي-اق جەكە باسىن كۋالاندىراتىن قۇجاتى جوق 338 شەتەلدىك ازامات قابىلداپ-تاراتۋ پۋنكتىنە ورنالاستىرىلدى»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.