وزبەكستاندا تۇراتىن قانداسىمىز سول ەلدىڭ ۇلتتىق سيمفونيالىق وركەسترىنىڭ باس ديريجەرى اتاندى

وزبەكستاننىڭ ۇلتتىق سيمفونيالىق وركەسترىنە قازاق جىگىتى باس ديريجەرلىك ەتەدى

الىبەك قابدىراحمانوۆتىڭ كورشى رەسپۋبليكانىڭ جەتەكشى مۋزىكا ۇجىمىنا باسشىلىق ەتكەنىنە – 2 جىل. قانداسىمىز وزبەكستاندا ءتۋىپ-وسىپ، وتباسىن قۇرعان. جارىمەن ەكى بالا تاربيەلەپ وتىر. «اتامەكەنىم قازاقستانعا گاسترولدىك ساپار بولا قالسا، قاتتى قۋانامىن»، - دەيدى الىبەك.

«مەنىڭ اتا-انام وسى تاشكەنتتە دۇنيەگە كەلدى. ال اتا-اجەم اتىراۋ جاقتان كوشىپ كەلگەن. ءبىز – كىشى ءجۇز، اداي رۋىنان تاراعان قازاقپىز. وتباسىم قازاقى ءسالت-داستۇردى ۇستانادى. انام مەن اجەم قازاقشا سويلەسسە، مەنىمەن ورىس تىلىندە سويلەسەدى. ارينە، تازا قازاق بولعاننان كەيىن انا ءتىلىمدى ءبىلۋىم كەرەك، بۇل قاتەلىگىمدى مويىندايمىن. ءقازىر قازاق ءتىلىن ۇيرەنۋ كەرەك دەپ مىندەت قويدىم. مەن ءوز ءىسىمدى سۇيەمىن. بۇل – بەدەلدى جۇمىس. پاندەمياعا دەيىن جىلىنا 70 كونسەرت بەرەتىنبىز. شەت مەملەكەتتەرگە دە ءجيى شىعىپ، اۋقىمدى شارالارعا قاتىسىپ تۇرامىز. وزبەكستاننىڭ باستى وركەسترىن باسقارۋ مۇمكىندىگىن سىيلاعانى ءۇشىن مەملەكەتكە العىسىمدى ايتامىن»، - دەيدى وزبەكستان ۇلتتىق سيمفونيالىق وركەسترىنىڭ باس ديريجەرى الىبەك قابدىراحمانوۆ.

وزبەكستاننىڭ ۇلتتىق سيمفونيالىق وركەسترىنىڭ قۇرامىندا 80-گە جۋىق مۋزىكانت بار. باس ديريجەردىڭ جەتەكشىلىگىمەن ۇجىم تالعامپاز تىڭداۋشىنى ونەرىمەن ءتانتى ەتىپ كەلەدى. ۇجىمنىڭ رەپەرتۋارىندا كلاسسيكالىق شىعارمالاردان باسقا زاماناۋي تۋىندىلار، ءتىپتى قازاقتىڭ ۇلتتىق كۇيلەرى دە بار ەكەن.