كەلەسى جىلدىڭ 5 قاڭتارىندا ەسكى كولىكتەردى قابىلداۋ قايتا باستالادى
ىستەن شىققان كولىك قۇرالدارىن جويۋعا قابىلداۋ 2022 جىلدىڭ 5 قاڭتارىندا قايتا باستالادى. ق ر يندۋستريا جانە ينفراقۇرىلىمدىق دامۋ مينيسترلىگى مەن ق ر ەكولوگيا، گەولوگيا جانە تابيعي رەسۋرستار مينيسترلىگى توزىعى جەتكەن 70 مىڭ ەسكى كولىكتى (جەڭىل جانە جۇك تەحنيكاسىن) قابىلداۋعا كۆوتا ءبولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەندى 5 قاڭتاردان باستاپ كولىك قابىلداۋدىڭ ەلەكتروندى كەزەگى اشىلىپ، وڭىرلەردەگى 18 بەكەت ءوز جۇمىسىن باستايدى. 2022 جىلى ايلىق ەسەپتىك كورسەتكىش مولشەرىنىڭ وزگەرۋىنە بايلانىستى، كولىك قۇرالىنىڭ ساناتى مەن جيىنتىعىنا بايلانىستى 165 402 تەڭگەدەن باستاپ 606 474 تەڭگەگە دەيىنگى ارالىقتا بولادى.
بيىل قازاقستاندىقتار ەسكى كولىك تاپسىرۋدان رەكوردتىق ناتيجە كورسەتتى. 2021 جىلى قازاقستاندىقتار 50 005 كولىكتى جويۋعا تاپسىردى. ونىڭ 37 495 جەڭىل كولىك، 4040 جولاۋشى جانە 8 470 جۇك كولىگى. ىستەن شىققان ماشيناسىن جويۋعا تاپسىرعاندارعا 13،833 ملرد تەڭگە قاراجات تولەندى. ايماقتار بويىنشا كولىك تاپسىرۋدىڭ الدىندا شىمكەنت قالاسى تۇر. اتالعان قالا تۇرعىندارى 12 068 كولىك وتكىزگەن. ەكىنشى ورىندا 5175 تاپسىرعان الماتى قالاسى جانە ءۇشىنشى ورىندا 4788 تەحنيكا وتكىزگەن تاراز قالاسى تۇر.
ۇزدىك تورتتىكتى 3239 بىرلىك ماشينا تاپسىرعان قاراعاندى قالاسى جايعاسقان. ىستەن شىققان كولىك قۇرالدارىن تاپسىرۋدى ىنتالاندىرۋ باعدارلاماسى باستالعاننان بەرى قابىلداۋ بەكەتتەرى 214 932 كولىك قۇرالىن كادەگە جاراتۋعا قابىلدادى. ونىڭ ىشىندە 194 163 جەڭىل اۆتوكولىك، 14 590 بىرلىك جۇك تەحنيكاسى جانە 6 179 بىرلىك اۋىر سالماقتىعى ماشينا. قابىلدانعان تەحنيكانىڭ بارلىعى قاراعاندى زاۋىتىنا كادەگە جاراتۋعا جىبەرىلەدى. قابىلداۋ بەكەتتەرىنىڭ مەكەنجايلارى جانە ەلەكتروندى كەزەككە تۇرۋ recycle.kz سايتىندا «قالدىقتاردى باسقارۋ»، ونىڭ ىشىندە «ەسكى كولىكتەردى قابىلداۋ» بولىمىندە ورنالاستىرىلعان.