سايلاۋعا بەس ۇمىتكەر قاتىسىپ جاتىر
24 قازاندا تاڭەرتەڭ وزبەكستاندا پرەزيدەنت سايلاۋى باستالدى، دەپ حابارلايدى Almaty-akshamy.kz.
سايلاۋ ۋچاسكەلەرى جەرگىلىكتى ۋاقىت بويىنشا تاڭعى ساعات 08:00-دە اشىلدى (نۇر-سۇلتان بويىنشا 09:00).
ەلدە رەسمي تۇردە جۇمىس ىستەپ جاتقان بەس ساياسي پارتيا ءوز ۇمىتكەرلەرىن تىركەدى. ساراپشىلاردىڭ پايىمداۋىنشا، جەڭىسكە جەتەتىن باستى ۇمىتكەر ەلدىڭ قازىرگى پرەزيدەنتى - 64 جاستاعى شاۆكات ميرزيويەۆ. ول وزبەكستاننىڭ ليبەرال-دەموكراتيالىق پارتياسى اتىنان ءتۇسىپ جاتىر.
ونىمەن سايلاۋعا ءتۇسىپ جاتقاندار «ۇلتتىق جاڭعىرۋ» دەموكراتيالىق پارتياسىنىڭ وكىلى الىشەر قادىروۆ، ەكولوگيالىق پارتيانىڭ وكىلى نارزۋللا ابلامۋرادوۆ، «ادىلدىك» سوسيال-دەموكراتيالىق پارتياسىنىڭ وكىلى باحرام ابدۋحاليموۆ، سونىمەن قاتار حالىق-دەموكراتيالىق پارتياسىنىڭ ۇمىتكەرى ماقسۋدا ۆاريسوۆا بار.
داۋىس بەرۋ كەشكى ساعات 20:00-گە دەيىن جالعاسادى (نۇر-سۇلتان بويىنشا 21:00). رەسپۋبليكادا بارلىعى 9925 داۋىس بەرۋ ۋچاسكەسى جاساقتالعان، سونىمەن قاتار شەتەلدەگى وزبەكستان وكىلدىگىندە جۇزگە جۋىق داۋىس بەرۋ ورنى اشىلعان. ورتالىق سايلاۋ كوميسسياسى سايلاۋشىلاردىڭ ءبىرىڭعاي ەلەكتروندى تىزىمىنە 19،9 ملن ادامدى ەنگىزدى. وعان قوسا 400 مىڭنان استام ازامات ۋاقىتىنان بۇرىن داۋىس بەرۋگە قاتىسقان، ول قازاننىڭ 14 مەن 20 ارالىعىندا وتكەن.
قاۋىپسىزدىكتى قامتاماسىز ەتۋ ءۇشىن وزبەكستان ىىم-گى 53 مىڭنان استام قىزمەتكەرى مەن قوعام وكىلدەرىن جۇمىلدىرعان. سايلاۋ ۋچاسكەسىنە كەلگەن ازاماتتاردان كارانتين تالاپتارى مەن قوعامدىق قاۋىپسىزدىك ەرەجەلەرىن ساقتاۋ ۇسىنىلادى. پاندەميا ءالى دە جالعاسىپ جاتقاندىقتان داۋىس بەرۋشىلەرگە بىررەتتىك ماسكا، پەرچاتكا جانە قولدى دەزينفەكسيالايتىن قۇرال بەرىلەدى. ونىڭ ۇستىنە بارلىق سايلاۋ ۋچاسكەلەرىندە مەديسينالىق پۋنكت اشىلاعان، وندا 21 مىڭنان استام مەديسينا قىزمەتكەرى جۇمىس ىستەپ جاتىر.
سايلاۋ بارىسىن مىڭعا جۋىق حالىقارالىق بايقاۋشىلار باقىلايدىر، ونىڭ قاتارىندا تمد، تمد پارلامەنت اسسامبلەياسىنىڭ، شانحاي ىنتىماقتاستىق ۇيىمى، يسلام ىنتىماقتاستىق ۇيىمدارى، وبسە، يۋنەسكو جانە وزگە ۇيىم وكىلدەرى بار. سونداي-اق 41 ەلدىڭ 268 وكىلى دە سايلاۋ بارىسىن باقىلايدى. سايلاۋ جايلى اقپارات تاراتۋ ءۇشىن 116 شەتەلدىك جانە 1،5 مىڭ جەرگىلىكتى جۋرناليست اككرەديتاسيادان وتكەن.