ۇكىمەت جۇمىسىنىڭ ءادىسى تۇبەگەيلى وزگەرەدى.
وزبەكستان پرەزيدەنتى شاۆكات ميرزيويەۆ ەل پارلامەنتىنە جاساعان جولداۋىندا مينيسترلىكتەر مەن ۆەدومستۆولاردىڭ سانى 61-دەن 28-گە دەيىن قىسقاراتىنىن ايتتى، دەپ حابارلايدى Almaty-akshamy.kz Gazeta.uz سىلتەمە جاساپ.
«ءبىرىنشى كەزەڭدە مينيسترلىكتەر رەفورمالانادى، ۇكىمەت جۇمىسىنىڭ ءادىسى دە تۇبەگەيلى وزگەرەدى. ەڭ الدىمەن، مينيسترلىكتەر مەن ۆەدومستۆولاردىڭ سانى قازىرگى 61-دەن 28-گە دەيىن قىسقارتىلاتىن بولادى. ەندى ءاربىر مينيسترلىك ءتيىستى سالادا مەملەكەتتىك ساياساتتى جۇزەگە اسىرۋعا، سونداي-اق قۇرىلىمعا كىرەتىن كوميتەتتەردى، اگەنتتىكتەر مەن ينسپەكسيالاردى باسقارۋعا جاۋاپتى بولادى»، - دەدى وزبەكستان پرەزيدەنتى.
وزبەكستان باسشىسى مەملەكەتتىك باسقارۋدىڭ شاعىن ءارى ءتيىمدى جۇيەسىنە كوشۋدى ۇسىندى.
«نەلىكتەن مەن ءسوزىمدى وسى باعىتتاعى رەفورمادان باستاپ وتىرمىن؟ بۇرىن جويىلىپ كەتۋ الدىندا تۇرعان سالالاردى اياعىنا كوتەرۋ ءۇشىن التى جىل ىشىندە جاڭا مينيسترلىكتەر مەن ۆەدومستۆولار قۇرۋ قاجەت بولدى. ولاي ىستەمەسەك، ءقازىر جەتكەن جەتىستىگىمىزگە قول جەتكىزە الماس ەدىك»، - دەپ ءتۇسىندىردى پرەزيدەنت.
ونىڭ ايتۋىنشا، وزبەكستان مەكتەپكە دەيىنگى ءبىلىم بەرۋ، تۇرعىن ۇي-كوممۋنالدىق شارۋاشىلىق، ينۆەستيسيالار، كوممۋنالدىق قىزمەتتەر، مەملەكەتتىك-جەكەشەلىك ارىپتەستىك سالالارىندا "ۇلكەن ناتيجەلەرگە قول جەتكىزدى".
ميرزيويەۆ جەكە باستامانى كەڭەيتۋ مەن وعان جاڭا مۇمكىندىكتەردى اشۋ قاجەت ەكەنىن اتاپ ءوتتى. ەندى، ول اتاپ وتكەندەي، قولمەن باسقارۋدان ناقتى ناتيجەگە جۇمىس ىستەيتىن جۇيەلىك باسقارۋعا كوشۋدىڭ ۋاقىتى كەلدى.
«قازىرگى ۋاقىتتا مەملەكەتتىك اپپاراتتا كوپتەگەن قايتالاناتىن [فۋنكسيالار] بار، قاجەتسىز باسقارمالار بار دەپ اشىق ايتۋ كەرەك. وعان قوسا ورتالىقتاندىرۋدىڭ دەڭگەيى تىم جوعارى. ناتيجەسىندە، بۇگىنگى كۇننىڭ كۇردەلى ماسەلەلەرىنىڭ دۇرىس شەشىمىن تابۋعا كوپ ۋاقىت، كۇش پەن جىگەر جۇمسالادى. [ماسەلە] اۋداننان پرەزيدەنتكە جەتۋ ءۇشىن قانشا ۋاقىت قاجەت؟ ءوزىمىز ەلەستەتىپ كورەيىك. بيۋروكراتيا ءبىزدىڭ اياعىمىزدى بايلايتىن شىرماۋىققا اينالدى. مينيسترلەردىڭ، بىلايشا ايتقاندا، ۇكىمەت قابىلداعان شەشىمدەردە داۋىسى جوق. ياعني، ولاردىڭ وسى شەشىمدەردى دايىنداۋعا جانە ىسكە اسىرۋعا قاتىسۋى مەن جاۋاپكەرشىلىگى جەتكىلىكسىز»، - دەپ قوستى ميرزيويەۆ.