فيلم جامبىل جابايەۆتىڭ ءومىرىنىڭ سوڭعى 9 جىلىن قامتيدى.
19 جەلتوقسان كۇنى الماتى قالاسىنداعى Chaplin MEGA Alma-Ata كينوتەاترىندا «جامبىل. جاڭا ءداۋىر» كوركەم ءفيلمىنىڭ پرەسس-كورسەتىلىمى ءوتتى، دەپ حابارلايدى Almaty-akshamy.kz Inbusiness.kz cىلتەمە جاساپ.
ءفيلمنىڭ وقيعالار جەلىسى جامبىل جابايەۆتىڭ ءومىرىنىڭ سوڭعى 9 جىلىن قامتيدى. ءدال وسى كەزەڭدە اقىننىڭ اتى بۇكىل كەڭەس وداعىنا دۇركىرەي تانىلعان بولاتىن، ءبىراق اقىننىڭ باسىنا تۇسكەن بار اتاق-داڭقتىڭ باسقا قىرىن ءبىرى بىلسە، ءبىرى بىلمەيدى.
جامبىل جابايەۆ توقسانعا كەلگەندە قازاقستان ونەرپازدارىنىڭ ەكىنشى سلەتىنە قاتىسىپ، اقىندار اراسىندا باس جۇلدە الادى. ونىڭ سۇرانشى باتىر جايلى داستانىن قالماقان ءابدىقادىروۆ قولما-قول جازىپ الىپ، گازەتكە باسادى. وسى وقيعادان سوڭ، سوۆەت يدەولوگياسىن جاساۋشىلار جامبىلدىڭ ابىرويى مەن تانىمالدىعىن پايدالانۋعا كىرىسەدى. جامبىل تۇلعاسىمەن تولىقتاي اينالىسا باستايدى. ونىڭ كوپتەگەن ولەڭدەرىن سوۆەت ساياساتىنا تەلىپ بۇرمالايدى. الايدا، جامبىل بۇعان دەيىن دە قازاق اراسىندا زور ابىروي مەن كەڭ تانىمالدىققا يە بولاتىن. ول ءوزىنىڭ ولەڭدەرىن بۇرمالاۋشىلارمەن كەلىسىمگە كەلگىسى جوق ەدى. ءبىراق سوۆەت بيلىگى قولداعى بار تەتىكتەردى پايدالانا وتىرىپ، ونىڭ اساۋ باسىن نوقتاعا سىيدىرۋعا تىرىسادى. مىنە، فيلم جەلىسى سۋىرىپ سالما اقىننىڭ ءومىرىنىڭ وسى تۇسىنا كوبىرەك ءمان بەرەدى.