وزبەكستاندى جارىقپەن قامتۋ جۇيەسى 70%-عا قالپىنا كەلتىرىلدى.
سارسەنبى كۇنگى جاپپاي ۇزىلىستەن كەيىن وزبەكستاندى ەلەكترمەن قامتۋ 70%-عا قالپىنا كەلتىرىلدى. ەنەرگەتيكالىق جۇيەدەگى ءىرى اقاۋلار جويىلدى جانە ەلدىڭ ءبىرىڭعاي ەنەرگەتيكالىق جەلىسىنە ەنەرگيا جەتكىزىلدى، دەپ حابارلادى Almaty-akshamy.kz Interfax.ru اگەنتتىگىنە cىلتەمە جاساپ.
«جۇيەدەگى ءىرى اقاۋلار جويىلدى، رەسپۋبليكانىڭ ءبىرىڭعاي ەنەرگەتيكالىق جۇيەسىنە ەلەكتر ەنەرگياسى جەتكىزىلدى. ەلەكترمەن قامتۋ 70 پايىزعا قالپىنا كەلتىرىلدى»، - دەپ حابارلادى ەلدىڭ ەنەرگەتيكا مينيسترلىگىنىڭ وكىلى.
ونىڭ ايتۋىنشا، تاشكەنتتە جانە كەيبىر وبلىستاردا ەلەكتر قۋاتىن بەرۋ تولىعىمەن قالپىنا كەلتىرىلىپ، جەرگىلىكتى پروبلەمالار جويىلۋدا.
«ەڭ الدىمەن حالىق پەن الەۋمەتتىك نىساندار ەلەكتر قۋاتىمەن قامتاماسىز ەتىلدى»، - دەپ اتاپ ءوتتى ەنەرگەتيكا مينيسترلىگىنىڭ وكىلى.
ونىڭ ايتۋىنشا، جىلۋ ەلەكتر ستانسيالارىنىڭ ەنەرگوبلوكتارىن كەزەڭ-كەزەڭىمەن ىسكە قوسۋ جالعاسىپ جاتىر.
ۆەدومستۆودا جۇيەدەگى اقاۋلاردىڭ سالدارىنان ەلىمىزدەگى جۇمىس ىستەپ تۇرعان گاز كەن ورىندارى مەن مۇناي وڭدەۋ زاۋىتتارىندا تەحنولوگيالىق پروسەستەردى بۇزۋ فاكتىلەرى ورىن الاتىنىنا نازار اۋداردى.
«بۇل ءوز كەزەگىندە گاز ءوندىرۋدىڭ تومەندەۋىنە اكەلەدى. سوندىقتان جىلۋ ەلەكتر ستانسيالارىندا گاز قىسىمىنىڭ تومەندەۋى بايقالادى، بۇل ەلەكتر ەنەرگياسىن ءوندىرۋ كولەمىنە كەرى اسەر ەتەدى»، - دەپ اتاپ ءوتتى ەنەرگەتيكا مينيسترلىگى.
وزبەكستاننىڭ تۇرعىن ۇي-كوممۋنالدىق شارۋاشىلىعى مينيسترلىگىنىڭ مالىمەتىنشە، تاشكەنت پەن باسقا دا ءىرى قالالاردى سۋمەن قامتاماسىز ەتۋ تولىعىمەن قالپىنا كەلتىرىلدى.
كولىك مينيسترلىگى رەسپۋبليكا قالالارى اراسىندا جۇردەك «افروسيوب» پويىزدارىنىڭ قوزعالىسى قايتا جاندانعانىن حابارلادى. تاشكەنتتە تاڭعى بەستەن ەلەكتر قۋاتىنىڭ ۇزىلۋىنە بايلانىستى ءبىر كۇن بۇرىن ۇزىلگەن مەترونىڭ جۇمىسى قالپىنا كەلتىرىلدى.
25 قاڭتار كۇنى تاڭەرتەڭ قازاقستان، وزبەكستان جانە قىرعىزستاندا جاپپاي ەلەكتر قۋاتى ءۇزىلدى. بۇل ورتالىق ازيانىڭ ءبىرتۇتاس ەنەرگەتيكالىق جۇيەسىندەگى اپاتقا بايلانىستى بولۋى مۇمكىن.
ورتالىق ازيانىڭ ءبىرتۇتاس ەنەرگەتيكالىق جۇيەسىنە وزبەكستان، وڭتۇستىك قازاقستان، سونداي-اق قىرعىزستان، تاجىكستان جانە تۇركىمەنستان كىرەدى.