بارلىعى 240 ازامات اقتالدى.
وزبەكستان سوۆەت وداعى كەزىندە قۋدالانعان ازاماتتاردى اقتادى، دەپ حابارلايدى Almaty-akshamy.kz
وزبەكستان جوعارعى سوتى سوۆەت بيلىگىنە قارۋلى قارسىلىق كورسەتكەنى ءۇشىن (باسماشىلار قوزعالىسى) قۋدالانعان 240 ازاماتقا قارسى بەس قىلمىستىق ءىستى قايتا قاراپ، ولاردىڭ ءبارىن اقتادى. بۇل تۋرالى جوعارعى سوتتىڭ باسپا ءسوز قىزمەتى حابارلادى.
مالىمەتكە قاراعاندا، اقتالعاندار قازىرگى قاراقالپاقستان، سۇرقانداريا، ناۋاي، سامارقان جانە قاشقاداريا وبلىستارىندا 1929-1931 جىلدارى «سوۆەت بيلىگىنە قارسى قارۋلى بۇلىك جاساعان». ولار وزبەك سسر جانە قازاق سسر ازاماتتارى.
بيىل 19 ساۋىردە دە جوعارعى سوتتىڭ قىلمىستىق ىستەر جونىندەگى سوت القاسى 1930-1931 جىلدارى رەپرەسسيالانعان 208 وزبەكستاندىققا قارسى ءۇش قىلمىستىق ءىستى قاراپ، ولاردىڭ ءبارىن اقتاعان.
بۇل ازاماتتار 1930-1931 جىلدارى ورتا ازيا بىرلەسكەن مەملەكەتتىك ساياسي بيۋروسى ءۇشجاقتى كەڭەس شەشىمى نەگىزىندە سىبىردەگى لاگەرلەرگە ايدالعان.