وزبەكستان پارلامەنتى قاراقالپاقستاننىڭ ەگەمەندىك مارتەبەسىن ساقتاۋ تۋرالى شەشىم قابىلدادى

سوڭعى كۇندەرى قاراقالپاقستان استاناسى نۇكىستە ەرەۋىلدەر بولدى.

وزبەكستان پارلامەنتى قاراقالپاقستاننىڭ ەگەمەندىك مارتەبەسىن وزگەرتۋ تۋرالى باپتى بۇكىلحالىقتىق تالقىلاۋدان الىپ تاستاۋ تۋرالى شەشىم قابىلدادى، دەپ حابارلايدى Almaty-akshamy.kz Inbusinnes.kz سىلتەمە جاساپ. 

بۇل تۇزەتۋلەر نۇكىستەگى حالىقتىڭ باس كوتەرۋىنە اكەلىپ سوققان ەدى. 

وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ «وزبەكستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» كونستيتۋسيالىق زاڭ جوباسىن بۇكىلحالىقتىق تالقىلاۋ بارىسىندا قاراقالپاقستان حالقىنىڭ ۇسىنىستارى مەن پىكىرلەرى تۋرالى ايتقان سوزىندە جوعارعى كەڭەس دەپۋتاتتارىمەن جانە قاراقالپاقستان حالقىنىڭ وكىلدەرىمەن كەزدەسۋ بارىسىندا بارلىق ۇسىنىستاردى ەسكەرۋ قاجەتتىگىن اتاپ ءوتتى. ياعني وزبەكستان رەسپۋبليكاسى كونستيتۋسياسىنىڭ 70ء-شى، 71ء-شى، 72ء-شى، 74ء-شى جانە 75-باپتارى وزگەرىسسىز قالادى، ال قولدانىستاعى نورمالار ساقتالادى. 

زاڭ شىعارۋشى پالاتا «وزبەكستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» كونستيتۋسيالىق زاڭ جوباسىن بۇكىلحالىقتىق تالقىلاۋ مەرزىمىن 2022 جىلعى 15 شىلدەگە دەيىن ۇزارتۋ تۋرالى شەشىم قابىلدادى. 

ەستەرىڭىزگە سالا كەتەيىك، سوڭعى كۇندەرى قاراقالپاقستان استاناسى نۇكىستە ەرەۋىلدەر بولدى. نارازىلىق شاراسى كەزىندە ناقتى قانشا ادامنىڭ زارداپ شەككەنى جاريالانبادى. قاراقالپاقستاندى ەگەمەندىگىنەن ايىرۋ تۋرالى وزگەرىستىڭ كونستيتۋسياعا ەنگىزىلمەك بولۋى حالىقتىڭ باس كوتەرۋىنە اكەلىپ سوقتى. وزبەكستان اۋماعىندا 2 تامىزعا دەيىن توتەنشە جاعداي ەنگىزىلدى. قازاقستانمەن اراداعى شەكارا بەكەتتەرى جابىلىپ، پويىز قاتىناسى توقتاتىلدى.