وزبەكستان پرەزيدەنتى شاۆكات ميرزيەيەۆ ەل كونستيتۋسياسىنا قاراقالپاقستان ەگەمەندىگىن جويۋعا قاتىستى وزگەرىستەردى كەرى قايتاردى. پرەزيدەنت باسپا ءسوز قىزمەتىنىڭ Telegram ارناسىنداعى حابارعا قاراعاندا، مەملەكەت باسشىسى قاراقالپاقستاندا زيالى قاۋىم وكىلدەرىمەن كەزدەسۋدە وسىنداي پىكىر ايتقان، دەپ حابارلايدى Almaty-akshamy.kz Inform.kz-كە سىلتەمە جاساپ.
پرەزيدەنت بۇگىن نوكىس قالاسىنا بارىپ، قاراقالپاقستان جوقارعى كەڭەسىنىڭ دەپۋتاتتارى جانە قوعام بەلسەندىلەرىمەن كەزدەسكەن. ونىڭ ايتۋىنشا، ەل كونستيتۋسياسىنا وزگەرىستەر ەنگىزۋ تۋرالى زاڭ جوباسى ءالى دە حالىق تالقىسىندا.
«ەرەكشە ايتارىم، «وزبەكستان رەسپۋبليكاسىنىڭ كونستيتۋسياسىنا وزگەرتۋلەر مەن قوسىمشالار ەنگىزۋ تۋرالى» كونستيتۋسيالىق زاڭ جوباسى جالپىحالىق تالقىسىنان تولىق وتەدى. سودان كەيىن ازاماتتار بىلدىرگەن پىكىرلەر نەگىزىندە زاڭ شىعارۋ پالاتاسى (وزبەكستان پارلامەنتىنىڭ تومەنگى پالاتاسى) ونى جەتىلدىرە تۇسەدى»، - دەدى شاۆكات ميرزيەيەۆ.
پرەزيدەنت نەگىزگى زاڭعا حالىقتىڭ پىكىرىن ەسكەرە وتىرىپ وزگەرىس ەنگىزىلەتىنىن ايتتى.
«قاراقالپاقستان رەسپۋبليكاسىنىڭ وزىنە ءتان ەتنيكالىق، مادەني ەرەكشەلىكتەرى، ۇلتتىق ادەت-عۇرىپتارى مەن قۇندىلىقتارى، ايرىقشا قۇقىقتىق مارتەبەسىن ەسكەرە وتىرىپ، جوباداعى قاراقالپاقستان رەسپۋبليكاسىنىڭ قۇقىقتىق مارتەبەسىنە قاتىستى نورمالاردى وزگەرىسسىز قالدىرۋ قاجەت دەپ ەسەپتەيمىن. ياعني، كونستيتۋسيانىڭ 70، 71، 72، 74، 75-باپتارى وزگەرتىلمەيدى»، - دەپ مالىمدەدى وزبەكستان پرەزيدەنتى.