الماتى قالاسىنداعى جاستاردى تۇرعىن ۇيمەن قامتاماسىز ەتۋگە باعىتتالعان «الماتى جاستارى» باعدارلاماسى كوپتەگەن جاس ماماندارعا ءوز باسپاناسىنا قول جەتكىزۋگە مۇمكىندىك بەردى. سولاردىڭ ءبىرى – ءادىلجان جابىقباي.
الماتى قالاسىنىڭ تۋماسى، قازاق اۆتوموبيل-جول اكادەمياسىنىڭ «ينجەنەر-مەحانيك» ماماندىعىن ءتامامداعان جاس مامان 2018 جىلدان بەرى الماتى ەلەكترومەحانيكا كوللەدجىندە وندىرىستىك وقىتۋ شەبەرى بولىپ قىزمەت اتقارىپ كەلەدى. ول باسپانالى بولۋ ءۇشىن مەملەكەتتىك باعدارلامانىڭ مۇمكىندىگىن پايدالانۋدى ءجون كورگەن.
– «الماتى جاستارى» باعدارلاماسى تۋرالى بۇرىننان بىلەتىنمىن، سوندىقتان مۇمكىندىك پايدا بولعان كەزدە قاتىسۋعا شەشىم قابىلدادىم. العاشقى جىلى قۇجاتتارىمدى تاپسىرعانىمدا، رەزەرۆكە عانا ءىلىنىپ، جولداما الا المادىم. ءبىراق ءۇمىتىمدى ۇزبەي، كەلەسى جىلى قايتا ءوتىنىش بەردىم. قۇجات تاپسىرۋ قيىن بولعان جوق، ءبارى ەلەكتروندىق فورماتتا جۇزەگە اسىرىلدى. ەكىنشى رەت قاتىسقانىمدا، كونكۋرس ناتيجەسى بويىنشا جەڭىمپاز اتانىپ، ءبىر بولمەلى پاتەرگە يە بولدىم. ءقازىر ءوز شاڭىراعىم بار، تۇراقتى ءومىر سۇرۋگە مۇمكىندىك الدىم، – دەيدى جاس مامان.
ءادىلجاننىڭ ايتۋىنشا، بۇل باعدارلاما جاستار ءۇشىن ۇلكەن قولداۋ. الايدا قازىرگى نارىقتاعى باسپانا باعاسى جىل ساناپ ءوسىپ كەلە جاتقاندىقتان، باعدارلاما اياسىندا بەرىلەتىن شەكتى سومانى كوبەيتۋ قاجەتتىلىگى تۋىنداپ وتىر.
– ءۇي باعاسى ايتارلىقتاي قىمباتتاپ كەتتى، سوندىقتان «الماتى جاستارى» باعدارلاماسىنا بولىنەتىن قارجى كولەمىن ۇلعايتسا دەگەن ۇسىنىس بار. كوپ جاستار قازىرگى تاڭدا وتباسىلى، بالالارى بار. سوندىقتان تەك ءبىر بولمەلى ەمەس، ەكى نەمەسە ءۇش بولمەلى پاتەر الۋعا مۇمكىندىك جاسالسا، بۇل جاستار ءۇشىن ۇلكەن كومەك بولار ەدى، – دەيدى ول.
جالپى، بيىل 6000-نان استام الماتىلىق مەملەكەتتىك تۇرعىن ءۇي باعدارلامالارى اياسىندا باسپانالى بولادى دەپ جوسپارلانعان. ونىڭ ىشىندە «الماتى جاستارى» باعدارلاماسى بويىنشا جەڭىلدەتىلگەن يپوتەكالىق نەسيە الۋ مۇمكىندىگى قاراستىرىلعان. بۇل باعدارلاما جاس ماماندارعا تومەن پايىزبەن پاتەر الۋ مۇمكىندىگىن ۇسىنىپ قانا قويماي، ولاردىڭ بولاشاققا دەگەن سەنىمىن نىعايتادى.
جاستارعا قانداي جەڭىلدىكتەر قاراستىرىلعان؟
قازىرگى تاڭدا قالادا 40 مىڭنان استام ادام باسپانا كەزەگىندە تۇر. ولاردىڭ قاتارىندا حالىقتىڭ الەۋمەتتىك وسال توپتارىنا جاتاتىن ازاماتتار دا بار. باسپانا ماسەلەسىن شەشۋ ءۇشىن مەملەكەت تاراپىنان بىرنەشە جەڭىلدەتىلگەن يپوتەكالىق باعدارلامالار ۇسىنىلعان. ولاردىڭ قاتارىندا:
· «الماتى جاستارى» – 5%-دىق جەڭىلدەتىلگەن نەسيە، 35 جاسقا دەيىنگى ازاماتتارعا ارنالعان.
· «باقىتتى وتباسى» – 2%-دىق نەسيە، كوپبالالى وتباسىلار، 1 جانە 2-توپتاعى مۇگەدەكتەر، جەتىم بالالار ءۇشىن.
· «شاڭىراق» – 5%-دىق جەڭىلدەتىلگەن يپوتەكا، باسپانا كەزەگىندە تۇرعان ازاماتتارعا ارنالعان.
سونداي-اق، مەملەكەتتىك باعدارلامالار اياسىندا العاشقى جارنانىڭ ءبىر بولىگىن وتەۋگە كومەكتەسەتىن تۇرعىن ءۇي سەرتيفيكاتتارى قاراستىرىلعان. بۇل جاس ماماندارعا تۇرعىن ءۇي الۋدا ۇلكەن جەڭىلدىك بەرەدى.
جاستارعا قولداۋ كورسەتەتىن وسىنداي باستامالاردىڭ ارقاسىندا كوپتەگەن جاس ماماندار ءوز باسپاناسىنا قول جەتكىزىپ، بولاشاققا نىق قادام باسۋدا.