الماتى قالاسىنداعى №7 قالالىق كلينيكالىق اۋرۋحاناعا 30 جاستاعى ەر ادام بۇلشىق ەتتەرىنىڭ اۋىرسىنۋىنان جانە اياقتارىن جازا الماۋىنان شاعىمدانىپ جۇگىنگەن. ونىڭ ايتۋىنشا، ءۇش اي بۇرىن فۋتبول ويىنى كەزىندە تىزەسىن جاراقاتتاپ العان، ءبىراق دارىگەرگە قارالماي، ۇيدە ءوز بەتىنشە ەمدەلگەن. بۇل تۋرالى №7 قكا باسپا ءسوز قىزمەتى حابارلادى.
«دوپ ويناپ ءجۇرىپ، ناۋقاس جۇرەلەپ وتىرىپ، اياقتارىن بىردەن سوزباق بولعاندا بۋىنى بلوكقا ءتۇسىپ قالعان. پاسيەنتكە «مەديالدى مەنيسكتىڭ ءۇزىلۋى، تىزە بۋىنىنىڭ بلوكقا ءتۇسۋى، بۇلشىق ەتتىڭ اۋىرسىنۋ سيندرومى» دەگەن دياگنوز قويىلدى. مرت ناتيجەلەرى مەنيسكتىڭ ءۇزىلىپ كەتكەنىن راستادى. ناۋقاسقا ءمامس قاراجاتى ەسەبىنەن تىزە بۋىنىنىڭ ارتروسكوپياسى جاسالدى. بۇل ورگاندى ساقتاپ قالۋعا باعىتتالعان وتا بولىپ، مەديالدى مەنيسككە ءىش جاعىنان 4 تىگىس سالىندى، مەنيسك قايتا تىگىلدى»، – دەپ ءتۇسىندىردى ورتوحيرۋرگيا بولىمشەسىنىڭ مەڭگەرۋشىسى ارنات بايزاقوۆ.
دارىگەرلەر وتا ءساتتى وتكەنىن اتاپ ءوتتى، ءبىراق جاراقات العان جاعدايدا ۋاقىتىلى مەديسينالىق كومەككە جۇگىنۋدىڭ ماڭىزدىلىعىنا توقتالدى.
«قيمىل-قوزعالىس اپپاراتى زاقىمدانعان كەزدە دارىگەرگە دەر كەزىندە جۇگىنبەۋ اۋىر زارداپتارعا اكەلۋى مۇمكىن. مۇنداي جاراقاتتار ناۋقاستى ءوز بەتىنشە ءجۇرىپ-تۇرۋ مۇمكىندىگىنەن ايىرۋى ىقتيمال. سوندىقتان ءوز بەتىنشە ەمدەلۋدەن، اسىرەسە «گۋگل دارىگەرگە» سۇيەنۋدەن ساق بولعان ءجون. ۋاقىتىلى كومەك الۋ – ساۋىعۋدىڭ باستى شارتى»، – دەدى ارنات بايزاقوۆ.
دارىگەرلەر حالىقتى قيمىل-قوزعالىس جۇيەسىنىڭ جاراقاتتارىنا سالعىرت قاراماۋعا جانە كەز كەلگەن جاعدايدا كاسىبي مەديسينالىق كومەككە جۇگىنۋگە شاقىردى. بۇل اۋىر زارداپتاردىڭ الدىن الىپ، قالپىنا كەلۋ پروسەسىن جەڭىلدەتەدى.