الماتىدا بەس كۇندە 30-دان استام كۇردەلى «زەرگەرلىك» وتا جاسالدى
الماتى تورىندە ورنالاسقان كارديولوگيا جانە ىشكى اۋرۋلار عزي-دا وتاندىق اريتمولوگتار رەسەيلىك پروفەسسور، رعا اكادەميگى سەرگەي ارتەمەنكونىڭ جەتەكشىلىگىمەن 5 كۇن ىشىندە 30-دان استام كۇردەلى «زەرگەرلىك» وپەراسيا جاسادى، دەپ حابارلايدى اlmaty-akshamy.kz. بۇل وتالار وتە كۇردەلى جانە جۇرەك ىرعاعىنىڭ بۇزىلۋىن ەمدەۋدىڭ ەڭ ءتيىمدى ءادىسى سانالادى.
«ءبىز الىس جانە جاقىن شەتەلدەردىڭ كوپتەگەن مەديسينالىق ورتالىقتارىمەن جانە كلينيكالارىمەن ىنتىماقتاستىقتامىز. جەتەكشى رەسەيلىك مامانمەن بىرلەسكەن وپەراسيالار جۇرگىزە وتىرىپ، عزي دارىگەرلەرى ۇلكەن تاجىريبە الۋدا. سەرگەي نيكولايەۆيچ جۇرەكشە فيبريللياسياسى بار ەمدەلۋشىلەردە راديوجيىلىكتى كاتەتەرلىك ابلياسيا پروسەدۋراسىنىڭ تيىمدىلىگىن ارتتىرۋعا مۇمكىندىك بەرەتىن ءادىسنامالىق تاسىلدەردى ازىرلەدى. بۇل ادىستەر حالىقارالىق جانە ۇلتتىق كلينيكالىق ۇسىنىستارعا ەنگىزىلدى. پروفەسسور ارتەمەنكوعا وپەراسيالاردى كاسىبي قولداعانى ءۇشىن العىسىمدى بىلدىرگىم كەلەدى»، – دەيدى ينستيتۋتتىڭ باسقارما ءتوراعاسى مارات پاشيموۆ.
راديوجيىلىك كاتەتەرلىك ابلياسيا جۇرەككە ەڭ كۇردەلى جوعارى تەحنولوگيالىق وپەراسيالاردى جاساۋعا مۇمكىندىك بەرەتىن ءۇش ولشەمدى ناۆيگاسيالىق كارتاعا ءتۇسىرۋدىڭ وزىق جۇيەلەرىن پايدالانا وتىرىپ جۇرگىزىلەدى. وسىلايشا ادامداردىڭ ءومىرىن قۇتقارادى، ولاردى تولىققاندى ومىرگە قايتارادى. بۇل جۇيە الماتىدا تەك كارديولوگيا جانە ىشكى اۋرۋلار عزي-دا عانا بار.
اپتانىڭ سوڭىنا دەيىن جۇرەكشەلەر فيبريللياسياسى جانە باسقا دا كۇردەلى ەكتوپيكالىق وشاقتارى بار ناۋقاستارعا وتا جاسالادى. ەلىمىزدىڭ باسقا كلينيكالارىندا بىرنەشە رەت قايتالاپ وتا جاسالعان ناۋقاستار بار.
مىسال كەلتىرسەك، كۇردەلى اريتميامەن 63 جانە 54 جاستا 2 ناۋقاسقا وپەراسيا جاسالدى. ولاردىڭ ەكەۋى دە قوزعالماسا دا جۇرەگىنىڭ ءجيى سوعاتىنىن، فيزيكالىق جۇكتەمە كەزىندە ەنتىگەتىنىن، دەنەسىن ۇنەمى السىزدىك جايلاپ العانىن ايتقان. ماسەلە مىنادا، اريتميانىڭ پاتولوگيالىق وشاقتارى جۇرەكتىڭ وتكىزگىش جۇيەسىندە ونىمەن «ءقاۋىپتى» جاقىندىقتا ورنالاسقان. پەرسونالدىڭ جوعارى بىلىكتىلىگىنىڭ، زاماناۋي تەحنولوگيالىق جابدىقتىڭ جانە پاسيەنتتەردى ءتيىستى دايارلاۋدىڭ ارقاسىندا وپەراسيالار ءساتتى ءوتتى.
پروفەسسوردىڭ ايتۋىنشا، 3D تەحنولوگيالارى اريتميانىڭ كوزىن – جۇرەكتىڭ باسقا تىندەرىنە زاقىم كەلتىرمەستەن پاتولوگيالىق وشاقتى 1 ميلليمەترگە دەيىن تابۋعا كومەكتەسەدى. ناۋقاس تولىعىمەن قالپىنا كەلەدى، ناتيجە وپەراسيا كەزىندە كورىنەدى.
بۇل – ءىس جۇزىندە «زەرگەرلىك» جۇمىس. ىرعاقتىڭ بۇزىلۋىن دياگنوستيكالاۋدىڭ دالدىگىن ارتتىرۋ ارقىلى ەمدەۋدىڭ تيىمدىلىگى، وپەراسيادان كەيىنگى ەرتە جانە الىس كەزەڭدەردەگى پاسيەنتتەردىڭ ءومىر ساپاسى ارتادى، كەنەتتەن قايتىس بولۋ، اسقىنۋلار جانە ت.ب. سانى ازايادى.