ارحەولوگ-عالىمدار مەن رەستاۆراتورلار «ەجەلگى وتىرار قالاسىن ءىشىنارا قالپىنا كەلتىرۋ» جوباسى اياسىندا ءتيىستى جۇمىستاردى تولىعىمەن اياقتادى. بۇل تۋرالى Almaty-akshamy.kz Inform.kz-كە جاساپ حابارلايدى.
عالىمدار ەجەلگى قالاشىق اۋماعىندا اق وردا بيلەۋشىسى ەرزەن حان سالعان حاناكانىڭ ورنىن تاپتى. سونداي-اق، ماماندار كۇيدىرىلگەن كىرپىشتەن قالانعان مەشىت پەن XV عاسىردىڭ باسىندا ءامىر تەمىر توقتامىس حاننىڭ ەلشىلەرىن قابىلداعان بەردىبەك سارايىن ءىشىنارا رەستاۆراسيالادى، «جاراقتى»، سولتۇستىك جانە سوپىحان قاقپالارىن تولىعىمەن قالپىنا كەلتىردى.
قالاعا «جاراقتى» قاقپاسى ارقىلى كىرگەن تۇستا تۇرعىن ۇيلەر مەن قىش شەبەرحاناسى بار كەشەن تابىلدى. تۇرعىن ۇيلەردىڭ ماڭىندا ءوندىرىس ورىندارى ورنالاسقان، وندا قىش ىدىستار جاسالاتىن ەكى كامەرالى پەش پەن قىش بۇيىمدار كەپتىرىلەتىن الاڭ انىقتالدى. عالىمدار تۇرعىن ۇيلەردەگى شەبەرحانالار XV-XVI عاسىرلاردا جۇمىس ىستەگەنىن ايتادى. سونداي-اق، XVII عاسىرداعى بازار الاڭىندا دا قازبا جۇمىستارى جۇرگىزىلدى، وندا ناۋبايحانا كەشەنى جانە تۇرعىن ءۇي ورامى انىقتالىپ، رەستاۆراسيالاۋ مەن كونسەرۆاسيالاۋ جۇمىستارى جۇرگىزىلدى.
ءۇش جىلعا سوزىلعان اۋقىمدى جوبا اياسىندا ەسكەرتكىشتەردى ساقتاۋ جانە تۋريستەردىڭ قاۋىپسىزدىگىن قامتاماسىز ەتۋ ءۇشىن وتىرار قالاسىنىڭ اۋماعىندا بەينەباقىلاۋ كامەرالارى ورناتىلدى، كوشەلەر ەلەكتر شامدارىمەن جارىقتاندىرىلدى، جاياۋ جۇرگىنشىلەر مەن ەلەكتروكارلارعا ارنالعان جولدار سالىندى، تۋريستەردىڭ دەمالۋىنا ارنالعان ورىندىقتار، سۋبۇرقاقتار، مودۋلدىك دارەتحانالار مەن قوقىس جاشىكتەرى ورناتىلدى.
وتىرار قالاشىعىن ءىشىنارا قالپىنا كەلتىرۋ جوباسى بويىنشا جۇمىس ناتيجەلەرىمەن تانىسۋ بارىسىندا داۋرەن ابايەۆ تۋربيزنەس وكىلدەرىمەن كەزدەستى. جيىندا مينيستر «ۇلى جىبەك جولى» تۋرىن ۇيىمداستىرىپ، جەتىلدىرۋ بويىنشا تاپسىرما بەردى.
«وتىرار قالاشىعىنىڭ اۋماعىندا اۋقىمدى جۇمىس اتقارىلدى. ەندى الماتى تاراز، شىمكەنت، تۇركىستان سياقتى قالالاردى جانە وڭتۇستىك ءوڭىردىڭ بارلىق نەگىزگى مادەني-تاريحي وبەكتىلەرىن قامتيتىن «ۇلى جىبەك جولى» گراند-مارشرۋتىن قۇرۋ قاجەت. تۋريستەرگە تارازداعى ايشا ءبيبى، بابادجا حاتۋن، تەكتۇرماس كەسەنەلەرىن، ودان ءارى شىمكەنتتەگى يبراھيم اتا كەسەنەسى مەن سيتادەلدى، تۇركىستانداعى ارىستان باب جانە احمەت ياسساۋي كەسەنەلەرى، كەيىن وتىرار جانە ساۋران قالاشىقتارى سياقتى تاريحي-مادەني نىساندار كىرەتىن تۋريستىك باعىت ۇسىنۋ قاجەت. ەگەر تۋرپاكەتتەر دۇرىس ۇيىمداستىرىلسا، بۇل باعىت شەتەلدىكتەر ءۇشىن عانا ەمەس، جەرگىلىكتى تۋريستەر ءۇشىن دە قىزىقتى بولادى»، - دەدى داۋرەن ابايەۆ.
ءوز كەزەگىندە وتاندىق تۋروپەراتورلار حالىقتى 1-7 كۇن ىشىندە كيەلى جانە تاريحي ورىندارعا اپارۋ بويىنشا تۋرلار ۇسىنۋعا دايىن ەكەنىن جەتكىزدى.
ايتا كەتەيىك، ەندى وتىرار قالاشىعى اشىق اسپان استىنداعى مۋزەي رەتىندە جۇمىس ىستەپ، تۋريستەردى قابىلدايدى.