عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا انتون چەحوۆتىڭ «شيە باعى» پەساسى جەلىسى بويىنشا ساحنالانعان سپەكتاكلدىڭ پرەمەراسى ءوتتى.
بۇل قويىلىم – جاس ءارى دارىندى رەجيسسەر راچا ماحاتايەۆتىڭ ساحنالاۋىمەن زاماناۋي كوزقاراسپەن قايتا جاڭعىرتىلعان كلاسسيكا.
– وتكىزگەن ترەنينگ اياسىندا قويىلىم اكتەرلارىن بىردەن تاڭداپ الدىم. پەسانى قىسقارتىپ، ەكى اي دايىندالدىق جانە كومپوزيتور، حورەوگراف، سۋرەتشىمەن بىرگە بىرلىكپەن جۇمىس ىستەدىك. باستاپقىدا 6 ءارتىستى تاڭداپ الىپ، ولاردىڭ باسى بىرىككەن ساتتە «شيە باعىن» قويۋدى جوسپارلادىق. قويىلىمداعى نەگىزگى يدەيا – ومىردەگى ادامنىڭ شاراسىزدىعى، ءولىمنىڭ – تراگەديا دا، ازاپ تا ەمەس ەكەنىن ۇعىندىرۋ، – دەدى رەجيسسەر.
رولدەردى سومداعان – جانار ماقاشيەۆا، جومارت زەينابىل، نۇرجان اسىلحان، رابينا بەلگىبايەۆا سىندى قازاق تەاتر ونەرىنىڭ جارقىن تۇلعالارى.
سپەكتاكلدەگى باستى كەيىپكەر – ليۋبوۆ اندرەيەۆنانىڭ وبرازىن سومداعان جانار ماقاشيەۆا ارتىستەرگە رەجيسسەرمەن ىستەگەن جۇمىس پەن قويىلىمنىڭ ۇلكەن ساباق بولعانىن جەتكىزدى.
– دايىندىققا ءبىر ايداي ۋاقىت كەتتى جانە رەجيسسەرمەن جۇمىس ىستەگەن سونداي ۇنادى. پسيحولوگ ەكەن، ىشكى جان دۇنيەمىزدى اقتارا الدى. ءار سپەكتاكل ءارتۇرلى بولعاندىقتان، بۇل قويىلىم بىزگە ۇلكەن ساباق بولدى. بۇل كەيىپكەردىڭ جان دۇنيەسى مەن ءۇشىن وتە كۇردەلى. كەيبىر تۇسىن ءوز ومىرىڭە ەنگىزگىڭ كەلەدى. مەن سومداعان كەيىپكەر قايعىسىن كۇلكىمەن جاسىرۋعا تىرىسادى. دەگەنمەن، مەن كەيىپكەردىڭ سەزىمىن وزىمە جاقىن قابىلداماۋعا تىرىسامىن. باستىسى، قويىلىمدا جۇمىسى دەسە، جانىن بەرەتىن جاندار جينالعان. ىنتىزارلىق تانىتقان بارشا كورەرمەنگە شەكسىز العىس بىلدىرەمىن، – دەدى اكتريسا.
«شيە باعى» – ادامنىڭ ىشكى مۇڭى مەن ءومىردىڭ وتكىنشى تۇستارىن سۋرەتتەيتىن تەرەڭ فيلوسوفيالىق تۋىندى. قويىلىم – وتكەن مەن جاڭاشىلدىققا قادام باسۋ اراسىنداعى كۇرەستى سيپاتتايدى. اسىرەسە، زىرعىعان ۋاقىت پەن مەن وزگەرىس زاڭدىلىعىنا مويىنسۇنۋ، ادامنىڭ تاعدىر جولىنداعى دارمەنسىزدىگى تەرەڭىنەن قاۋزالادى. ءومىر مەن ءولىمنىڭ، شىندىق پەن ەلەستىڭ اراسىنداعى نازىك شەكاراعا وي جۇگىرتىپ، ماڭگىلىكتىڭ ءمانىن ىزدەۋگە جەتەلەيتىن تۋىندى كورەرمەننىڭ كوڭىلىنەن شىقتى.
ايتا كەتەيىك، پرەمەرا الداعى كۇندەرى دە جالعاسادى.