جاتىردىڭ شىرىشتى قاباتىنىڭ قاتەرلى ىسىگى (ەندومەترييدىڭ قاتەرلى ىسىگى) ايەلدەر اراسىندا ءجيى كەزدەسەتىن ونكولوگيالىق اۋرۋلاردىڭ ءبىرى بولىپ وتىر. ونكولوگتاردىڭ دەرەكتەرىنە سايكەس، بۇل اۋرۋ كوبىنە 45 جاستان اسقان ايەلدەردە انىقتالادى. الايدا سوڭعى جىلدارى ونى جاس شاماسى تومەن پاسيەنتتەردەن دە دياگنوستيكالاۋ جاعدايلارى تىركەلىپ كەلەدى. الماتىدا دا وسى اۋرۋعا شالدىققان ايەلدەر سانى ەداۋىر، ماماندار ماسەلە تۋرالى حاباردارلىقتىڭ ارتۋىنا بايلانىستى دارىگەرگە جۇگىنۋشىلەر لەگى كوبەيگەنىن اتاپ وتەدى.
اۋرۋدىڭ دامۋى ىقتيمالدىلىعىن ارتتىراتىن نەگىزگى فاكتورلاردىڭ قاتارىندا گورمونالدىق بۇزىلىستار (اسىرەسە ەستروگەن دەڭگەيىنىڭ جوعارى بولۋى)، ارتىق دەنە سالماعى مەن سەمىزدىك، قانت ديابەتى، ارتەريالىق گيپەرتەنزيا، جۇكتىلىكتىڭ بولماۋى نەمەسە كەش جۇكتىلىك، تۇقىم قۋالايتىن بەيىمدىلىك، سونداي-اق از قوزعالىستى ءومىر سالتى بار. الماتى ونكولوگيالىق ورتالىعىنىڭ ونكوگينەكولوگيا ءبولىمىنىڭ مەڭگەرۋشىسى رايحان بولاتبەكوۆانىڭ ايتۋىنشا، بىرنەشە فاكتوردىڭ قاتار اسەر ەتۋى اۋرۋ ءقاۋپىن ايتارلىقتاي ارتتىرادى. سوندىقتان ءقاۋىپ توبىنا كىرەتىن ايەلدەرگە پروفيلاكتيكالىق تەكسەرۋدەن جۇيەلى تۇردە ءوتىپ تۇرۋ اسا ماڭىزدى.
اۋرۋدى دەر كەزىندە انىقتاۋعا كەدەرگى كەلتىرەتىن ءبىرقاتار قاتە تۇسىنىك بار. ەڭ كەڭ تاراعان ويلاردىڭ ءبىرى — ەندومەترييدىڭ قاتەرلى ىسىگى سەبەپسىز جانە كەنەتتەن پايدا بولادى دەگەن پىكىر. ءىس جۇزىندە، كوپ جاعدايدا اۋرۋ الدىن الا انىقتالۋى مۇمكىن پرەدراكتى جاعدايلار فونىندا داميدى، ولاردى گينەكولوگتىڭ جوسپارلى قابىلداۋىندا انىقتاۋعا بولادى. تاعى ءبىر قاتە تۇسىنىك — اۋىرسىنۋ بولماسا، الاڭداۋعا نەگىز جوق دەگەن وي. اۋرۋدىڭ باستاپقى كەزەڭدەرىندە ول كوبىنە اۋىرسىنۋسىز وتەدى جانە تەك ەتەككىر ارالىق مەزگىلسىز نەمەسە قان ارالاس بولىندىلەردىڭ پايدا بولۋىمەن بايقالۋى مۇمكىن، اسىرەسە مەنوپاۋزا كەزەڭىنەن كەيىن.
گينەكولوگقا پروفيلاكتيكالىق قارالۋ، كىشى جامباس اعزالارىنىڭ ۋلترادىبىستىق زەرتتەۋى جانە قاجەت بولعان جاعدايدا گيستولوگيالىق تەكسەرۋ اۋرۋدى ەرتە ساتىدا انىقتاۋعا مۇمكىندىك بەرەدى. كەش انىقتالعان جاعدايدا كوبىنە جاتىر مەن قوسالقىلاردى حيرۋرگيالىق جولمەن الىپ تاستاۋ، كەيىن ساۋلەلى نەمەسە حيميوتەراپيا جۇرگىزۋ قاجەتتىلىگى تۋىندايدى. بۇل ايەلدىڭ گورمونالدى تەڭگەرىمىنە، ەموسيونالدىق جاعدايىنا جانە ءومىر ساپاسىنا اسەر ەتۋى مۇمكىن. ال ەرتە دياگنوستيكا جاعدايىندا بولجام الدەقايدا قولايلى، ال ەمدەۋ تيىمدىرەك ءارى جەڭىلىرەك وتەدى.
رايحان بولاتبەكوۆا پروفيلاكتيكانىڭ جانە سكرينينگتىك باعدارلامالارعا قاتىسۋدىڭ ماڭىزدىلىعىن اتاپ وتەدى.
الماتىدا ونكولوگيالىق اۋرۋلاردى ەرتە انىقتاۋعا باعىتتالعان سكرينينگتىك تەكسەرۋلەر جالعاسۋدا. بۇل تەكسەرۋلەر اۋرۋدى ەڭ باستاپقى كەزەڭدەرىندە انىقتاۋعا مۇمكىندىك بەرەدى، ول كەزدە ەمدەۋ بارىنشا ناتيجەلى، ال تولىق ساۋىعۋ مۇمكىندىگى ەداۋىر جوعارى. تەگىن سكرينينگتەن 30-دان 74 جاسقا دەيىنگى ايەلدەر جاتىر موينى وبىرىنا، 40-تان 76 جاسقا دەيىنگى ايەلدەر ءسۇت بەزى وبىرىنا، سونداي-اق 50-دەن 76 جاسقا دەيىنگى ەرلەر مەن ايەلدەر كولورەكتالدىق (توق جانە تىك ىشەك) قاتەرلى ىسىككە تەكسەرىلە الادى.
سكرينينگتىك زەرتتەۋلەر تىركەلگەن ەمحانالاردا جۇرگىزىلەدى. تەكسەرۋدەن ءوتۋ ءۇشىن ۋچاسكەلىك دارىگەرگە نەمەسە تىركەۋ بولىمىنە جۇگىنۋ جەتكىلىكتى. ماڭىزدىسى، ساقتاندىرىلماعان ازاماتتار دا حالىق دەنساۋلىعىن قورعاۋعا باعىتتالعان مەملەكەتتىك پروفيلاكتيكالىق باعدارلامالار اياسىندا ونكوسكرينينگتەن تەگىن وتە الادى.
ەرتە دياگنوستيكا — ءساتتى ەمدەلۋدىڭ كىلتى.
سكرينينگتىك باعدارلامالارعا جۇيەلى قاتىسۋ دەنساۋلىقتى جانە ءومىردى ساقتاۋعا كومەكتەسەدى.