ماماندار داۋىلدى ەسكەرتۋلەردىڭ بار ەكەنىن ەسكە سالادى.
رەسپۋبليكا بويىنشا وتكەن تاۋلىكتە 45 ادام قار قۇرساۋىنان قۇتقارىلدى، دەپ حابارلايدى Almaty-akshamy.kz تجم باسپا ءسوز قىزمەتىنە سىلتەمە جاساپ.
جۇرگىزۋشىلەر ەلەمەگەن قاتتى اياز بەن اۋا رايىنىڭ قولايسىزدىعى توتەنشە جاعدايعا اكەلدى. 27 قاراشادا شىعىس قازاقستان وبلىسىنىڭ زايسان اۋدانىندا قاراتال اۋىلىنان 10 كم قاشىقتىقتا «ومبى-مايقاپشاعاي» تاس جولىندا ونداعان جۇك فۋرگونى قار قۇرساۋىندا قالىپ قويدى. ولارعا 25ء-وسب قۇتقارۋشىلارى كومەككە كەلدى. اۋىر جۇك كولىگىنىڭ 16 جۇرگىزۋشىسىنىڭ ءبىرى دارىگەرلەردىڭ كومەگىنە مۇقتاج بولدى. قۇتقارىلعان جۇرگىزۋشى، بەلارۋس ازاماتىنىڭ قولىن جەڭىل ۇسىك شالىپ، جاقىن ماڭداعى مەديسينالىق مەكەمەگە جەتكىزىلدى. العاشقى كومەك العاننان كەيىن ول بوساتىلدى، اۋرۋحاناعا جاتقىزۋ قاجەت بولعان جوق. قالعان جۇرگىزۋشىلەردى قۇتقارۋشىلار قاراتال اۋىلىنا كۋنگ جىلى كولىگىمەن جەتكىزدى. قازىرگى ۋاقىتتا ولار قوناقۇيدە جانە ولارعا ءقاۋىپ ءتونىپ تۇرعان جوق. وقيعا ورنىندا جولدى تازارتاتىن جول قىزمەتتەرى جۇمىس ىستەپ جاتىر.
سول كۇنى قوستاناي وبلىسىنىڭ قامىستى اۋدانىندا التىنسارين اۋىلىنان 10 كم قاشىقتىقتا تجد كۇشتەرىمەن قار قۇرساۋىندا قالعان ەكى اۆتوكولىكتىڭ جولاۋشىلارى قۇتقارىلىپ، التىنسارين اۋىلىنىڭ جىلىتۋ پۋنكتىنە جەتكىزىلدى.
28 قاراشادا ۇلىتاۋ وبلىسىنىڭ جاڭاارقا اۋدانىندا، اقتوبە اۋىلىنان 5 شاقىرىم جەردە تجد كۇشتەرىمەن مەديسينالىق كومەككە مۇقتاج ەمەس 6 ادام قۇتقارىلدى. ولار «Toyota» تەحنيكالىق اقاۋلى اۆتوكولىگىنەن قۇتقارىلىپ، «اقتۇبەك» تمقپ-عا جەتكىزىلدى.
28 قاراشاعا قاراعان ءتۇنى قاراعاندى وبلىسىندا ءۇش قۇتقارۋ وپەراسياسى جۇرگىزىلدى. وساكاروۆ اۋدانى، مولودەجنىي كەنتىنەن 3 كم قاشىقتىقتا «قىزىلوردا-پاۆلودار» اۆتوجولىندا قاتىپ قالۋ سەبەبىنەن تەحنيكالىق اقاۋلارعا بايلانىستى جەڭىل اۆتوكولىك جولدا توقتاپ قالدى. قۇتقارۋشىلار كولىكتەن ەكى ادامدى ەۆاكۋاسيالاپ، مولودەجنىي كەنتىنە جەتكىزدى.
ەكىنشى قۇتقارۋ وپەراسياسى شەت اۋدانىندا جۇرگىزىلدى. «الماتى-ەكاتەرينبۋرگ» اۆتوجولىنىڭ 901 شاقىرىمىندا اقسۋ-ايۋلى اۋىلىنان 18 شاقىرىم جەردە تەحنيكالىق اقاۋلى اۆتوبۋستان تجد كۇشتەرىمەن اقسۋ-ايۋلى اۋىلىنا 19 ادام جەتكىزىلدى. اۆتوبۋس «استانا-شىمكەنت» باعىتى بويىنشا بارا جاتقان.
وڭىرلەردىڭ توتەنشە جاعدايلار دەپارتامەنتتەرى بىرنەشە كۇن بويى جەل، بوران جانە اياز تۋرالى حاباردار ەتتى. قاتتى ايازعا بايلانىستى ءارتۇرلى كولىكتەر ءۇشىن قوزعالىس شەكتەۋلەرى ەنگىزىلدى. الايدا ازاماتتار ەلدى مەكەندەردەن تىس جاققا كەتىپ، قيىنشىلىقتارعا تاپ بولدى.
«تجم ءبىرقاتار وڭىرلەردە داۋىلدى ەسكەرتۋلەردىڭ بار ەكەنىن ەسكە سالادى. اۋا رايى بۇزىلعان كەزدە، اسىرەسە، تۇنگى ۋاقىتتا، الىس جولعا شىعۋدى جانە جاياۋ ءجۇرۋدى شەكتەۋ قاجەتتىلىگى تۋرالى ەسكەرتەمىز. ساپار الدىندا ءاۆتوموبيلدىڭ تەحنيكالىق جارامدىلىعىن تەكسەرىپ، مەتەورولوگيالىق بولجامدار جانە داۋىلدى ەسكەرتۋلەر تۋرالى اقپاراتتى قاداعالاپ وتىرىڭىز»، - دەلىنگەن مينيسترلىك حابارلاماسىندا.
قۇتقارۋشىلار تۇرعىنداردان اۋا رايى تۇراقتالعانعا دەيىن ساپارلاردان باس تارتۋدى جانە ولاردى باسقا ۋاقىتقا اۋىستىرۋدى سۇرادى. ەستەرىڭىزگە سالا كەتەيىك، جولداردىڭ جاي-كۇيى تۋرالى Darmen ءموبيلدى قوسىمشاسىنان بىلۋگە بولادى.توتەنشە جاعداي كەزىندە 112 ءنومىرى بويىنشا حابارلاۋ قاجەت.