2022 جىلعى قاڭتار-قىركۇيەك ارالىعىندا قازاقستانعا كەلۋشىلەر سانى 3،4 ملن ادامعا جەتىپ، الدىڭعى جىلمەن سالىستىرعاندا 3،6 ەسە ارتتى.
ءبىراق ەلگە كەلگەن ادامدار سانىنىڭ ءوسۋى تۋريزممەن بايلانىستى ەمەس، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
Energyprom.kz ساراپشىلارىنىڭ زەرتتەۋىنشە، قازاقستانداعى كەلۋشىلەردىڭ ارتۋىنا ەكى نارسە اسەر ەتكەن. ءبىرىنشىسى – كوروناۆيرۋستىق پاندەمياعا بايلانىستى كارانتيندىك شەكتەۋلەردىڭ جويىلۋى. ەكىنشىسى - رەسەيدەگى موبيليزاسياعا بايلانىستى رەسەيلىكتەردىڭ جاپپاي كەلۋى.
سىرتقى تۋريزم ايتارلىقتاي باسىم. مىسالى، 2022 جىلدىڭ توعىز ايىندا باسقا ەلدەرگە 5،6 ملن قازاقستاندىق دەمالۋعا كەتتى. بۇل وتكەن جىلى شەتەلدە قىدىرعانداردان 2،2 ەسە كوپ.
ىشكى تۋريزم، ياعني قازاقستان ىشىندە ساياحاتتاۋ دەڭگەيى ارتقان، الدىڭعى جىلمەن سالىستىرعاندا 25،1%-عا كوپ.
U.S.Newsء-تىڭ تۋريزم بويىنشا ۇزدىك ەلدەر رەيتينگىندە قازاقستان 85 ەلدىڭ ىشىندە 84ء-شى ورىندا تۇر. ءتۋريزمى ەڭ ناشار ەل يران بولسا، ودان كەيىنگى كەزەكتە قازاقستان. ەلىمىز ۋكراينا، وزبەكستان، ءازىربايجان، بەلارۋس، رەسەي سياقتى ەلدەردەن عانا ەمەس، زامبيادان، ليۆاننان، ميانمادان دا ارتتا قالعان.
ق ر تۋريستىك ءيميدجىن قالىپتاستىرۋدى دامىتۋ ءۇشىن بىرنەشە قادامدار جاساۋدا، ءبىراق ول ناتيجەسىز سەكىلدى. مىسالى، قازاقستاندا مەزگىل سايىن KITFء-تىڭ "تۋريزم جانە ساياحات" اتتى حالىقارالىق كورمەسى وتەدى، ول كوبىنەسە كوشپەلى ءتۋريزمدى دامىتۋعا ىقپال ەتەدى. كورمەگە وتاندىق تۋروپەراتورلار مەن باسقا دا ءتۇرلى ەلدەردىڭ وكىلدەرى كەلەدى.
سونىمەن قاتار، مادەنيەت جانە سپورت مينيسترلىگىنىڭ 2022 جىلعى بيۋدجەتتىك باعدارلامالارىن (كىشى باعدارلامالارىن) ىسكە اسىرۋ مونيتورينگىنىڭ ناتيجەلەرى بويىنشا "تۋريزم مەن تۋريستىك قىزمەتتى دامىتۋدى ىنتالاندىرۋ" ساناتىندا ۆەدومستۆوعا 402 ملن تەڭگە ۇسىنىلدى.
الايدا مۇندا ورىندالۋ پايىزى نەبارى 21،3%، ال يگەرىلمەگەن سوما — 316،2 ملن تەڭگە.