قازاقستاندا 2024 جىلى 1،2 ترلن تەڭگەگە 180 يندۋستريالىق جوبا ىسكە اسىرىلماق
قازاقستان ۇكىمەتى شيكىزاتقا باعدارلانعان ەكونوميكادان قوسىلعان قۇنى ەدەۋىر جوعارى سالالارعا باسىمدىق بەرەتىن ەكونوميكاعا ءوتۋ جونىندەگى شارالاردى ىسكە اسىرۋدى جالعاستىرۋدا. بۇل يندۋستريالاندىرۋدى جانە ونىڭ قارقىندى دامۋىن قامتاماسىز ەتۋگە مۇمكىندىك بەرەدى.
ماسەلەن، وتكەن جىلى وڭدەۋ ونەركاسىبىندە 928 ملرد تەڭگەگە 170 جوبا ىسكە اسىرىلدى. وتاندىق تاۋار وندىرۋشىلەرمەن 179 ۇزاق مەرزىمدى شارت پەن وففتەيك-كەلىسىمشارت جاسالدى. بارلىق قابىلدانعان شارالاردىڭ ارقاسىندا وڭدەۋ ونەركاسىبىنىڭ ەكونوميكاداعى ۇلەسى تاۋ-كەن ونەركاسىبىنىڭ ۇلەسىمەن تەڭەستى.
بيىل 1،2 ترلن تەڭگەگە 180 يندۋستريالىق جوبا ىسكە اسىرىلماق. سونداي-اق وڭدەۋ ونەركاسىبى كاسىپورىندارىن وتاندىق شيكىزاتپەن قامتاماسىز ەتۋدىڭ جاڭا تەتىگى يندۋستريالاندىرۋدى جەدەلدەتۋگە ىقپال ەتەتىن بولادى.
ماشينا جاساۋ سالاسىن دامىتۋدىڭ 2028 جىلعا دەيىنگى كەشەندى جوسپارىن ورىنداۋ ارقاسىندا وسى سالانىڭ جالپى قوسىلعان قۇنى 4،5 ەسە وسەدى دەپ كۇتىلۋدە.
جالپى بۇگىندە قازاقستاندا 32 ترلن تەڭگەگە 1 مىڭعا جۋىق ينۆەستيسيالىق جوبانىڭ جالپىۇلتتىق پۋلىن ىسكە اسىرۋ جالعاسۋدا. بۇل ەكونوميكانىڭ بارلىق سالالارىنا قاتىستى. 2023 جىلى 1،8 ترلن تەڭگەگە 298 جوبا ىسكە قوسىلدى. 2024 جىلى جالپى سوماسى 3،8 ترلن تەڭگەگە 326 جوبا ىسكە اسىرىلماق.
مەملەكەت باسشىسىنىڭ تاپسىرماسى بويىنشا ينۆەستيسيالىق شتابتىڭ جۇمىسى قايتا قارالىپ، كۇشەيتىلدى. ءىرى ينۆەستيسيالىق جوبالار بولەك قارالادى، تۋىندايتىن بارلىق ماسەلەلەر جەكە قارالىپ، شەشىلەتىن بولادى.