گاز ءوندىرۋ سالاسىندا جاڭا كەن ورىندارى ىسكە قوسىلۋدا

ەنەرگەتيكا سالاسىن دامىتۋ قازاقستان ۇكىمەتى جۇمىسىنىڭ باسىم باعىتتارىنىڭ ءبىرى بولىپ قالا بەرەدى. بۇل مۇناي-گاز سالاسىن نىعايتۋعا، ەلەكتر ەنەرگەتيكالىق ينفراقۇرىلىمدى جاڭعىرتۋعا جانە جاڭارتىلاتىن ەنەرگيا قۋاتىن ارتتىرۋعا قاتىستى.

ماسەلەن، مۇناي سالاسىندا تەڭىز، قاراشىعاناق جانە قاشاعان كەن ورىندارىن كەڭەيتۋگە باعىتتالعان ءىرى جوبالاردى ىسكە اسىرۋ جالعاسۋدا. كاسپيي قۇبىر كونسورسيۋمى قۇبىرىنىڭ قازاقستاندىق ۋچاسكەسىنىڭ وتكىزۋ مۇمكىندىگى جىلىنا 54-تەن 72،5 ملن تونناعا دەيىن ۇلعايتىلدى. بۇل رەتتە ترانسكاسپيي باعىتى بويىنشا مۇنايدىڭ العاشقى جەتكىزىلىمدەرى جۇرگىزىلدى، ولار 2 جىل ىشىندە 3 ملن تونناعا دەيىن ارتتىرىلاتىن بولادى.

سونىمەن قاتار شىمكەنت مۇناي وڭدەۋ زاۋىتىن كەڭەيتۋ بويىنشا بەلسەندى جۇمىستار جۇرگىزىلىپ كەلەدى. ناتيجەسىندە ونىڭ قۋاتتىلىعى جىلىنا 6 ملن توننادان 12 ملن تونناعا دەيىن ارتىپ، ىشكى نارىقتاعى جانار-جاعارماي قاجەتتىلىگىن تولىق قامتاماسىز ەتەدى.

• گاز ءوندىرۋ سالاسىندا جاڭا كەن ورىندارى ىسكە قوسىلۋدا. وندىرىلەتىن قورى 31 ملرد تەكشەمەتردەن استام گازدى قۇرايتىن «روجكوۆسكوە»، «وڭتۇستىك اقساي» جانە «اناباي» كەن ورىندارىندا گاز ءوندىرۋ باستالدى. ورتا مەرزىمدى پەرسپەكتيۆادا وندىرىلەتىن قورى 69 ملرد تەكشەمەتر گاز بولاتىن «ورتالىق ورىكتاۋ»، «باتىس پرورۆا» جانە «قالامقاس» گاز كەن ورىندارىن ىسكە قوسۋ كۇتىلۋدە.

سونىمەن قاتار قاشاعان مەن قاراشىعاناقتا، سونداي-اق جاڭاوزەندە جاڭا گاز وڭدەۋ زاۋىتتارىن سالۋ بويىنشا جۇمىستار جۇرگىزىلىپ كەلەدى. «سارىارقا» گاز قۇبىرىنىڭ 2ء-شى جانە 3ء-شى كەزەگى، «اقتوبە-قوستاناي» گاز قۇبىرى جانە «بەينەۋ-بوزوي-شىمكەنت» گاز قۇبىرىنىڭ 2ء-شى جەلىسى جوسپارلانعان.

• بيىل مۇناي-گاز حيمياسىن دامىتۋ ءۇشىن جالپى قۇنى $1 ملرد-تى قۇرايتىن بۋتاديەن جوباسىنىڭ قۇرىلىسى باستالادى. بۇل رەتتە اتىراۋ جانە اقتوبە وبلىستارىندا $13،7 ملرد سوماسىنا پوليەتيلەن، پوليەتيلەنتەرەفتالات جانە كارباميد ءوندىرۋ بويىنشا باسقا دا ءىرى ينۆەستيسيالىق جوبالاردى ىسكە اسىرۋ جالعاسىپ كەلەدى.


• ەلەكتر ەنەرگەتيكاسى سالاسىنداعى جۇمىس ەلەكتر تاپشىلىعىن جويۋعا جانە ەكونوميكا ءۇشىن قاجەتتىلىكتەن كوبىرەك قۋات كوزدەرىن قۇرۋعا باعىتتالعان. 2023 جىلى شامامەن 500 مۆت بولاتىن قۋات كوزدەرى ىسكە قوسىلدى. 2024 جىلى 14 جوبا شەڭبەرىندە 825 مۆت، ونىڭ ىشىندە 12 جوبا اياسىندا 260 مۆت جاڭارتىلاتىن ەنەرگيا كوزدەرى ىسكە قوسىلادى.


• تۇركىستان، الماتى جانە قىزىلوردا وبلىستارىندا يكەمدى گەنەراسيا رەجيمى بار جىلۋ ەلەكتر ستانسالارى سالىنىپ جاتىر. سونىمەن قاتار ەكىباستۇز گرەس-2-دە 3ء-شى جانە 4ء-شى ەنەرگيا بلوكتارىن جاڭعىرتۋ جانە جاڭا گرەس-3 قۇرىلىسىنا دايىندىق جۇمىستارى جۇرگىزىلۋدە. كوكشەتاۋ، سەمەي جانە وسكەمەن قالالارىندا جاڭا جەو سالۋ جوسپارلانىپ وتىر.


• Total، Masdar، Acwa Power جانە Unigreen Energy ستراتەگيالىق ينۆەستورلارىمەن بىرلەسە وتىرىپ، جالپى قۋاتى 4 گۆت جاڭارتىلعان ەنەرگيا كوزدەرى جوبالارىن ىسكە اسىرۋ بويىنشا جۇمىس جۇرگىزىلىپ كەلەدى.