الماتىلىق دارىگەرلەر نەمىس نەيروحيرۋرگىمەن بىرلەسىپ گيدروسەفاليا سيندرومىمەن اۋىراتىن بىرنەشە بالاعا اسا كۇردەلى وتا جاسادى
وڭتۇستىك استاناداعى №2 بالالار قالالىق كلينيكالىق اۋرۋحانانىڭ نەيروحيرۋرگتەرى نەمىس ەلىنەن كەلگەن مامانمەن بىرلەسىپ گيدروسەفاليانىڭ كۇردەلى تۇرىمەن اۋىراتىن بالالارعا وتا جاسادى. دارىگەرلەر جاڭا ءادىستى قولدانا وتىرىپ، ەلىمىزدىڭ تۇپكىر-تۇپكىرىنەن كەلگەن 8 بالاعا وپەراسيا جاساپ شىقتى.
«وپەراسيالار «ميلوسەرديە» قوعامدىق قورى ۇيىمداستىرعان حالىقارالىق شەبەرلىك كلاسى شەڭبەرىندە جاسالدى. وعان بالالار گيدروفەسالياسى ماسەلەسىمەن اينالىساتىن گەرمانيالىق پروفەسسور ۋلريح-ۆيلگەلم تومالە قاتىستى. شەبەرلىك كلاسىنا رەسپۋبليكانىڭ وزگە وڭىرلەرىنەن، سونداي-اق كورشىلەس قىرعىزستان مەن تاجىكستاننان كەلگەن 54 دارىگەر قاتىستى. ولار شەبەرلىك كلاسى بارىسىندا شەتەلدەردە وتە قىمبات تۇراتىن وپەراسياعا قاتىسىپ، تاجىريبە الماسۋعا مۇمكىندىك الدى. وتالاردىڭ ءبارى دە جاڭا ينتراۆەنتريكۋليارلى نەيروەندوسكوپيالىق جۇيە نەگىزىندە جاسالدى»، - دەدى №2 بقكا ديرەكتورى مارات راباندياروۆ جۋرناليستەرگە.
اۋرۋحانانىڭ نەيروحيرۋرگيا بولىمشەسى مەڭگەرۋشىسى دانيار سابدەنالييەۆتىڭ ايتۋىنشا، اتالعان سيندرومعا شالدىققان بالالاردىڭ ميىنا سۇيىقتىق جينالادى. دەر كەزىندە دياگنوز قويىپ، ەم-دوم قابىلداماسا ناۋقاستىڭ ومىرىنە ءقاۋىپ تونەدى. ەم-دومنىڭ تابىستى بولۋى گيدروسەفاليانىڭ ميدى زاقىمداۋ دەڭگەيىنە، اۋرۋ بەلگىلەرىنە، اۋرۋ سالدارىنان پايدا بولعان اقاۋلارعا بايلانىستى. كەيبىر بالالار اناسىنان وسى سيندروممەن تۋىلسا، ەندى بىرەۋلەردىڭ ميىندا سۋ جۇرە كەلە پايدا بولادى.
«وپەراسيا بارىسىندا ەندوسكوپيالىق كامەرانى ميدىڭ قارىنشالارىنا ەنگىزىپ، كيستالاردى بىر-بىرىنە قوستىق. ونىڭ قيىندىعى دا وسىندا. وتا الداعى ۋاقىتتا مۇنداي حيرۋرگيالىق ارالاسۋدى بولدىرماۋعا جانە پاسيەنتتىڭ قالىپتى ومىرگە ورالۋىن قامتاماسىز ەتۋگە باعىتتالعان. بۇگىنگى مانيپۋلياسيالاردىڭ بالالارعا كومەكتەسەرى ءسوزسىز. اسىرەسە، نيەۆرولوگيالىق اۋىتقۋلار پايدا بولعان جانە كورۋ قابىلەتى ناشارلاعان ناۋقاستار وپەراسيا ناتيجەسىن بىردەن سەزە باستاۋى ءتيىس»، - دەدى دانيار سابدەنالييەۆ.
بۇرىن مۇنداي حيرۋرگيالىق وپەراسيالار 2-3 كەزەڭمەن جاسالاتىن. سالدارىنان بالالار وتا مەن ناركوز سالدارىنان كوپ قينالىپ، وز-وزىنە كەلۋىنە كوپ ۋاقىت قاجەت بولاتىن. جاڭا ءتاسىلدىڭ ارقاسىندا اسا كۇردەلى وتانى ءبىر ۋاقىتتا جاساۋعا مۇمكىندىك تۋىپ وتىر.
ماسەلەن، كىشكەنتاي نۇراي باعداۋلەتتىڭ دۇنيە ەسىگىن اشقانىنا 3-اق اي بولىپتى. گيدروسەفاليا سيندرومىنا ىشتە جاتقاندا شالدىققان ءسابي جۇكتىلىكتىڭ 28ء-شى اپتاسىندا تۋىلعان. دياگنوز قويىلعاننان كەيىن وتكەن جىلى قاراشا ايىندا وعان بىردەن وتا جاسالدى. ءقازىر شەبەرلىك كلاسى بارىسىندا تاعى دا ەم الدى.
«ءسابيدىڭ ميى ءدىن-امان. سۇيىقتىق تەك مي قارىنشاسىنا تۇسكەن. مەنىڭ بىلۋىمشە، بۇرىن بالانىڭ باسىنا قويىلاتىن شۋنتتى ءار 5 جىل سايىن اۋىستىرۋ قاجەت بولاتىن. بۇگىن قويعان شۋنتتىڭ ءومىر بويى تۇراتىنىن ەستىپ قۋانىپ قالدىم. ءبىزدىڭ نەيروحيرۋرگتارىمىز بەن نەمىس ەلىنەن كەلگەن ماماننىڭ ارقاسىندا وپەراسيا ءساتتى ءوتتى. بۇيىرسا، جۇما كۇنى اۋرۋحانادان شىعامىز»، - دەيدى اناسى تولقىن تالدىبايەۆا.
بالالاردى اۋرۋحانادا ەمدەۋگە، دارى-دارمەككە، وپەراسياعا قاجەتتى ماتەريالدار قۇنى ءمامس قاراجاتى ەسەبىنەن تولەندى.
«ميلوسەرديە» قورى شەتەلدەن دارىگەر شاقىرىپ، شەبەرلىك كلاسىن ۇيىمداستىردى. سونىڭ ارقاسىندا اتا-انالار بالاسىن شەتەلگە اپارىپ ەمدەتۋ ماشاقاتىنان قۇتىلدى.
دارىگەرلەردىڭ ايتۋىنشا، باسىنا وتا جاسالعان بالالاردىڭ بارىنەن دە جاقسى ناتيجە كورۋگە بولادى. جالپى، تەز قالپىنا كەلۋ ءۇشىن مۇنداي وپەراسيالاردى مەيلىنشە ەرتە، بالا كىشكەنتاي كەزىندە جاساعان دۇرىس. وتكەن جىلى №2 اۋرۋحانادا «مي گيدروسەفالياسى» دياگنوزى قويىلعان 200-گە جۋىق بالاعا وسىنداي وپەراسيا جاسالعان.