2022 جىلى الەۋمەتتىك قىزمەتتەر پورتالى ارقىلى شامامەن 336،9 مىڭ مۇگەدەكتىگى بار ادام وڭالتۋدىڭ تەحنيكالىق قۇرالدارىن (بۇدان ءارى – وتق)، 7،3 مىڭ – ىمداۋ ءتىلى قىزمەتىن، 27،3 مىڭ – جەكە كومەكشىنىڭ قىزمەتىن الدى.
سونداي-اق، پورتال ارقىلى كەپىلدىك بەرىلگەن الەۋمەتتىك توپتامالارعا 133 مىڭ تاپسىرىس راسىمدەلدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار بەرۋدى قامتيدى.
بۇگىنگى كۇنى پورتالدا ارناۋلى الەۋمەتتىك قىزمەتتەر كورسەتەتىن 827 مەديسينالىق-الەۋمەتتىك مەكەمە (بولىمشەلەر)، 288 وتق جەتكىزۋشى، 25 مىڭنان استام جەكە كومەكشى، 651 ىمداۋ ءتىلى قىزمەتىن ۇسىنۋشى، 93 ساناتورلىق-كۋرورتتىق ەمدەۋ، 69 كەپىلدىك بەرىلگەن الەۋمەتتىك توپتامانى جەتكىزۋشىلەر تىركەلگەن.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان.
قولداۋعا ارنالعان بايلانىس ورتالىعىنا 1414 ءبىرىڭعاي نومىرىنە قوڭىراۋ شالىپ، ءتىلدى تاڭداۋ جانە 5 سانىن باسۋ ارقىلى پورتالدى پايدالانۋ بويىنشا كەڭەس الۋعا بولادى.