الماتى پوليسياسى ويىن-ساۋىق ورىندارىندا قاۋىپسىزدىكتى كۇشەيتۋ قاجەتتىگىن مالىمدەدى
الماتى قالاسىنىڭ پوليسياسى قىلمىس ءجيى تىركەلەتىن ويىن-ساۋىق ورىندارىن انىقتاپ، ولاردىڭ قاۋىپسىزدىك شارالارىن كۇشەيتۋ قاجەتتىگىن اتاپ ءوتتى.
ىشكى ىستەر ءمينيسترى جاريالاعان پروفيلاكتيكا جىلى اياسىندا اۋەزوۆ اۋدانىندا ويىن-ساۋىق مەكەمەلەرىندەگى قاۋىپسىزدىك ماسەلەسى بويىنشا ارنايى جيىن ءوتتى. جيىنعا اۋداندىق پوليسيا باسقارماسىنىڭ، توتەنشە جاعدايلار دەپارتامەنتى مەن سانيتارلىق-ەپيدەميولوگيالىق قىزمەت ماماندارى، سونداي-اق بار، مەيرامحانا جانە تۇنگى كلۋب يەلەرى قاتىستى.
اۋەزوۆ اۋداندىق پوليسيا باسقارماسىنىڭ باستىعى دانيار مەڭدەبايەۆتىڭ ايتۋىنشا، اۋدانداعى 65 ويىن-ساۋىق مەكەمەسىنىڭ 16-سىندا بۇزاقىلىق پەن توبەلەس ءجيى تىركەلەدى. وتكەن جىلى وسى ورىنداردا 61 قىلمىس جاسالعان.
مەڭدەبايەۆ اتاپ وتكەندەي، كوپتەگەن ويىن-ساۋىق ورىندارى كۇزەت ۇيىمدارىنىڭ قىزمەتىنە ءتيىستى ليسەنزياسى جوق، ال كۇزەتشىلەر جانجالداردى توقتاتۋدىڭ ورنىنا، كەلۋشىلەردى عيماراتتان شىعارىپ جىبەرۋمەن عانا شەكتەلەدى. بۇل جاعداي قىلمىستىڭ كوبەيۋىنە اكەپ سوعادى.
كوميسسيا وتىرىسىنىڭ قورىتىندىسى بويىنشا، ويىن-ساۋىق ورىندارىندا قىلمىستىڭ الدىن الۋ شارالارىن كۇشەيتۋ تۋرالى شەشىم قابىلداندى. سونىمەن قاتار، ەسىرتكى ساۋداسىنىڭ الدىن الۋ جۇمىستارى باستى نازارعا الىنىپ، مەكەمە يەلەرىنە ناقتى مىندەتتەر جۇكتەلدى.
ويىن-ساۋىق مەكەمەلەرىنىڭ يەلەرىنە:
- ليسەنزياسى بار كاسىبي كۇزەت قىزمەتىن قولدانۋ؛
- بەينەباقىلاۋ كامەرالارىن ورناتۋ جانە ولاردىڭ سانىن ارتتىرۋ؛
- قاقتىعىس جاعدايلارىن ازايتۋ ءۇشىن قوسىمشا قاۋىپسىزدىك شارالارىن قاراستىرۋ مىندەتتەلدى.
الماتى قالاسىنىڭ قۇقىق قورعاۋ ورگاندارى قاۋىپسىزدىك ەرەجەلەرىن بۇزعان ويىن-ساۋىق ورىندارىنا قاتاڭ شارالار قولداناتىنىن ەسكەرتتى.