وتكەن جىلى الماتى مۋزەيلەرىن تاماشالاۋعا شامامەن 310 مىڭ ادام كەلگەن

ال بيلەتتەر ساتىلىمىنان 85،5 ملن تەڭگە تابىس ءتۇستى. بۇل - قالا تۇرعىندارى مەن قوناقتارىنىڭ مادەني مۇراعا دەگەن قىزىعۋشىلىعى ارتقانىن، مۋزەيلەردىڭ قىزمەت كورسەتۋ ساپاسى جاقسارعانىن دالەلدەيتىن رەكوردتىق كورسەتكىش، دەپ حابارلايدى aqshamnews.kz

2024 جىلدان بەرى وقۋشىلار قالالىق مۋزەيلەرگە تەگىن كىرەتىنىن ەرەكشە اتاپ وتكىم كەلەدى. بۇل مۇمكىندىكتى اتا-انالار عانا ەمەس، مۇعالىمدەر دە ءتيىمدى پايدالانىپ، بالالاردى ەكسكۋرسيالارعا اپارىپ ءجۇر. بىلتىر 85 مىڭ وقۋشى تاريحي جادىگەرلەر مەن ونەر تۋىندىلارىن گيدتەردىڭ جەتەكشىلىگىمەن زەرتتەپ، تانىستى. ولار وسى مۇمكىندىك ارقىلى مادەنيەت پەن ونەردى، تاريحتى تەرەڭ تۇسىنە باستايدى. بالالارىڭىزبەن بىرگە مۋزەيلەرگە بارۋدى ادەتكە اينالدىرىڭىزدار.

قالا اكىمى ەربولات اسقاربەك ۇلى مۋزەي ءىسىنىڭ جانە مۋزەي قىزمەتكەرلەرىنىڭ جان-جاقتى دامۋىنا ۇلكەن نازار اۋدارىپ، قولداۋ كورسەتىپ كەلەدى.

ءبىزدىڭ ماماندار الەمنىڭ ۇزدىك مادەني وشاقتارىندا كاسىبي داعدىلارىن جەتىلدىرىپ، ءبىلىم الىپ جاتىر. وقىپ-ۇيرەنگەنىن قالا مۋزەيلەرىندە ەنگىزىپ، قىزمەت كورسەتۋ ساپاسىن ارتتىرۋ ءۇشىن ايانباي ەڭبەك ەتۋدە. اكىمدىك باستاماسىمەن قىزمەتكەرلەردىڭ ايلىعى 30%-عا ءوسىپ، سوڭعى بىرنەشە جىلدا 30 مامان باسپانالى بولدى.

بىلتىر ارىپتەستەرىمىز 80-نەن استام كورمە وتكىزدى، جۇزدەگەن مادەني ءىس-شارا ۇيىمداستىرىپ، مادەني استانامىزدىڭ دامۋىنا اتسالىسىپ ءجۇر.

بيىل بىرنەشە مۋزەي قۇرىلىسى بويىنشا قۇجاتتامالار ازىرلەنەدى. ودان بولەك، الماتى اۋماعىندا ساقتالعان ەرتە تەمىر عاسىرىنىڭ جالعىز ەسكەرتكىشى – بورالداي ساق قورعاندارىن گەوسكانەرلەۋ جۇمىستارى بويىنشا اۋقىمدى جۇمىس اتقارىپ جاتىرمىز. جۋىردا مۋزەي ءىسىن دامىتۋ بويىنشا جاقسى جاڭالىقتارمەن بولىسەتىن بولامىز.