ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى ءاقمادي سارباسوۆ «وتباسىنىڭ سيفرلىق كارتاسى» جوباسىنىڭ ىسكە اسىرىلۋى تۋرالى ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
ونىڭ مالىمەتىنشە، بۇل قۇرال الەۋمەتتىك قاۋىپ-قاتەر ايماعىنداعى وتباسىلاردى جەدەل انىقتاۋعا جانە ولارعا قاجەتتى قولداۋ شارالارىن كورسەتۋگە مۇمكىندىك بەرەدى.
«جۇيە مەملەكەتتىك ورگاندار مەن ۇيىمداردىڭ اقپاراتتىق جۇيەلەرىنەن دەرەكتەردى جينايدى، سونىڭ نەگىزىندە تابىس، دەنساۋلىق، ءبىلىم، تۇرعىن ءۇي جانە الەۋمەتتىك جاعدايلار سياقتى بەلگىلەنگەن كريتەرييلەر بويىنشا وتباسىنىڭ ءال-اۋقاتىن باعالايدى. بۇل وتباسىلاردىڭ قاجەتتىلىكتەرىن اۆتوماتتى تۇردە انىقتاۋعا جانە ولارعا ءتيىستى الەۋمەتتىك قولداۋ كورسەتۋگە مۇمكىندىك بەرەدى»، – دەدى ول.
ءبىرىنشى ۆيسە-مينيستر اتالعان باستامالار نەگىزگى ستراتەگيالىق قۇجاتتاردا كورىنىس تاباتىنىن جانە حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسىندا، كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسىندا، ازىرلەنىپ جاتقان «كاسىپتىك بىلىكتىلىك تۋرالى» زاڭدا جانە الەۋمەتتىك كودەكستە زاڭنامالىق دەڭگەيدە بەكىتىلەتىنىن اتاپ ءوتتى.