وتباسىنىڭ سيفرلىق كارتاسىن ەنگىزۋدىڭ ناتيجەسىندە مىڭداعان قازاقستاندىقتار الەۋمەتتىك-ەڭبەك سالاسى بويىنشا وزدەرىنە كورسەتىلۋى ءتيىس مەملەكەتتىك قىزمەتتەردى ەش قيىندىقسىز 1414-تەن كەلگەن SMS-حابارلاماعا جاۋاپ بەرۋ ارقىلى پرواكتيۆتى تۇردە الدى، دەپ حابارلايدى Almaty-akshamy.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، بۇل قىزمەتتى وسك جانە مەملەكەتتىك قىزمەت كورسەتۋدىڭ پرواكتيۆتى فورماتىنىڭ ارتىقشىلىقتارىن بالالى بولعان ايەلدەر وڭ باعالاۋدا.
«مەن كوپبالالى وتباسىلارعا بەرىلەتىن جاردەماقى الۋعا قۇقىلى ەكەنىمدى بىلەتىنمىن، ءبىراق ول ءۇشىن ارنايى ينستانسيالارعا بارىپ ءوتىنىش جازىپ، قاعازدار جيناۋ كەرەك دەپ ويلادىم. وعان قاي كۇنى باراتىنىمدى جوسپارلاپ تا قويعان بولاتىنمىن. ءبىراق جوسپارىم اياق استىنان وزگەرىپ شىعا كەلدى، سەبەبى بوسانعاننان كەيىن بىرنەشە كۇن وتكەن سوڭ ۇيالى تەلەفونىما SMS-حابارلاما كەلدى. مەن وعان جاي عانا جاۋاپ بەرۋ ارقىلى جاردەماقى الۋشى بولدىم. بۇل وتە ىڭعايلى ەكەن»، – دەپ ءبولىستى قوستاناي وبلىسىنداعى قامىستى كەنتىنىڭ تۇرعىنى گۇلنار الدوڭعاروۆا.
«جالپى، مەن جاردەماقى تاعايىندالعانعا دەيىن وسىنداي فۋنكسيا بار ەكەنىن بىلمەدىم. SMS-حابارلاما كەلگەندە ماعان ەشقايدا بارۋدىڭ قاجەتى جوق ەكەنىنە قۋاندىم. مەنىڭ جاۋابىمنان كەيىن جاردەماقى تاعايىندالىپ، شوتىما اقشا ءبىر ايدان كەيىن ءتۇستى»، – دەدى تاراز قالاسىنىڭ تۇرعىنى نازگۇل شىرىنبەك.
وتباسىنىڭ سيفرلىق كارتاسى مەملەكەتتىك ورگانداردىڭ بارلىق قولدانىستاعى اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى. بۇگىنگى كۇنى وندا قازاقستاننىڭ 19،8 ملن-نان استام ازاماتى نەمەسە 6 ملن-نان استام وتباسى تۋرالى اقپارات جيناقتالعان.
ازاماتقا قولداۋ شاراسى قاجەت قانداي دا ءبىر ومىرلىك جاعداي تۋىنداعان ۋاقىتتا، ول ءموبيلدى ازاماتتار بازاسىندا كورسەتىلگەن نومىرىنە SMS-حابارلاما الادى جانە قىزمەت الۋ ۋاقىتىن ەداۋىر قىسقارتا وتىرىپ، وعان بىردەن جاۋاپ بەرۋىنە بولادى. ءوتىنىمدى رەسىمدەۋ ءۇشىن حقكو نەمەسە باسقا مەكەمەگە جۇگىنۋدىڭ قاجەتى جوق.
جىل باسىنان بەرى 740 مىڭنان استام وسىنداي حابارلاما جىبەرىلدى. ولارعا 283 مىڭنان استام ادام جاۋاپ بەردى جانە ەشقانداي ءوتىنىشسىز ءوز تولەمدەرىن نەمەسە جاردەماقىلارىن الدى.
ايتا كەتۋ كەرەك، بەلگىلى ءبىر مەملەكەتتىك كورسەتىلەتىن قىزمەتتى پرواكتيۆتى الۋعا مۇمكىندىك بەرەتىن SMS-تەن باسقا، وسك-دا زەينەتاقى جاسىنا جەتكەنگە دەيىن 2 اي بۇرىن زەينەتاقى تولەمدەرىن الۋ مۇمكىندىگى تۋرالى، بەرىلگەن/ۇزارتىلعان «قانداس» مارتەبەسىنىڭ اياقتالۋ مەرزىمى تۋرالى اۆتوماتتى حابارلامالار، سونداي-اق جۇمىسسىزدار ءۇشىن جۇمىس ىزدەۋ، تەگىن وقۋدان ءوتۋ مۇمكىندىكتەرى جانە جۇمىسپەن قامتۋ سالاسىنداعى مەملەكەتتىك قولداۋدىڭ باسقا دا شارالارى تۋرالى حاباردار ەتۋ تەتىگى ىسكە قوسىلدى.
الاياقتىق تاۋەكەلىن بولدىرماۋ ماقساتىندا 1414 ءبىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن اتاپ وتەمىز.
بارلىق سۇراقتار بويىنشا 1414 ءنومىرى بويىنشا بايلانىس ورتالىعىنا حابارلاسۋىڭىزعا بولادى. قوڭىراۋ شالۋ تەگىن.