ەلىمىزدىڭ مەكتەپتەرىندە وتباسىلىق قۇندىلىقتار مەن داستۇرلەردى قولداۋ جانە مەكتەپ پەن اتا-انا اراسىنداعى ىنتىماقاتاستىقتى نىعايتۋعا باعىتتالعان «وتباسىم – ماقتانىشىم» تاقىرىبىندا كەڭ اۋقىمدى اكسيا باستالدى.
اكسيا 12-16 قىركۇيەك ارالىعىندا بارلىق ورتا ءبىلىم بەرۋ ۇيىمدارىندا وتەدى جانە وعان 1 ميلليوننان استام اتا-انا قاتىسادى دەپ كۇتىلۋدە. جوبا اياسىندا 10 مىڭنان استام اۋقىمدى ءىس-شارا وتكىزۋ جوسپارلانۋدا، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
باستى باسىمدىق بالالاردى وقىتۋ مەن تاربيەلەۋدە وتباسى مەن مەكتەپتىڭ ءوزارا ىنتىماقتاستىعىن كۇشەيتۋ، ءپوزيتيۆتى اتا-انا مادەنيەتىن دامىتۋ جانە بالالاردىڭ ۇيلەسىمدى دامۋى ءۇشىن ءبىلىم بەرۋ مەكەمەلەرىندە قولايلى ورتا قالىپتاستىرۋ بولىپ تابىلادى.
«ءبىر اپتا ىشىندە ەلىمىزدىڭ ءبىلىم بەرۋ مەكەمەلەرى شىعارماشىلىق كونكۋرستار، شەبەرلىك سىنىپتارىن، وتباسىلىق تاقىرىپتىق ويىندار جانە تاعى باسقا اۋقىمدى ءىس-شارالار باعدارلاماسىن وتكىزەدى. مەكتەپ پسيحولوگتارى مەن پەداگوگتەر بالا مەن اتا-انانىڭ ءوزارا قارىم-قاتىناسىن جاقسارتۋ ءۇشىن ينتەراكتيۆتى ترەنينگتەر وتكىزەدى. اكسيا وتباسىلىق جانە ۇلتتىق داستۇرلەرگە ارنالعان اۋقىمدى مەرەكەمەن قورىتىندىلانادى»، - دەيدى «وركەن» ءبااۇعپي-نىڭ ءبىرىنشى ۆيسە-پرەزيدەنتى ەلەنا ساكەنوۆا.
«وتباسىم – ماقتانىشىم» اكسياسى «ءبىرتۇتاس تاربيە» باعدارلاماسى اياسىندا قۇرىلعان مەكتەپتەردەگى اتا-انالارعا پەداگوگيكالىق قولداۋ كورسەتۋ ورتالىقتارىنىڭ ۇيىمداستىرۋىمەن وتكىزىلەدى.