قىركۇيەكتىڭ ەكىنشى جەكسەنبىسىندە ەلىمىزدە وتباسى كۇنى اتاپ وتىلەدى. بۇل - ەلىمىزدەگى ەڭ قاستەرلى قۇندىلىقتاردىڭ ءبىرى سانالاتىن وتباسىن ۇلىقتايتىن، اتا-انا مەن بالا اراسىنداعى بايلانىستى نىعايتاتىن ەرەكشە مەرەكە.
وتباسى — ءاربىر ادامنىڭ العاشقى تىرەگى، تاربيەنىڭ باستاۋى. حالقىمىز "ۇيادا نە كورسەڭ، ۇشقاندا سونى ىلەرسىڭ" دەپ بەكەر ايتپاعان. تۇلعانىڭ قالىپتاسۋى ەڭ الدىمەن ونىڭ وتباسىنداعى تالىم-تاربيەسىنە بايلانىستى. اكە - اسقار تاۋ، انا - مەيىرىم بۇلاعى، ال بالا - وتباسىنىڭ باقىتى مەن بولاشاعى.
پرەزيدەنتىمىزدىڭ وتباسىن قولداۋ باعىتىنداعى باستاماسى – ەل بولاشاعى ءۇشىن ماڭىزدى ستراتەگيالىق قادامداردىڭ ءبىرى. مەملەكەت باسشىسى قاسىم-جومارت توقايەۆ جولداۋلارىندا جانە الەۋمەتتىك ساياساتتا وتباسى ينستيتۋتىن نىعايتۋ، بالالاردى قورعاۋ، ايەلدەر مەن جاستاردى قولداۋ ماسەلەلەرىنە ەرەكشە نازار اۋدارىپ كەلەدى.
پرەزيدەنتتىڭ بۇل باعىتتاعى ساياساتى ناقتى ىستەرمەن دالەلدەنىپ وتىر. سونىڭ جارقىن مىسالى – الماتى قالاسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ "ەرتە ارالاسۋدىڭ الەۋمەتتىك قىزمەتتەر ورتالىعىنىڭ" اشىلۋى. بۇل – مەملەكەت تاراپىنان كورسەتىلىپ وتىرعان تەرەڭ الەۋمەتتىك قامقورلىقتىڭ كورىنىسى. ەرتە ارالاسۋ ارقىلى بالالاردىڭ الەۋەتى ەرتە كەزەڭدە انىقتالىپ، ولاردىڭ قوعامعا تولىققاندى بەيىمدەلۋىنە مۇمكىندىك تۋادى. وسىنداي باستامالار وتباسى ينستيتۋتىن نىعايتىپ قانا قويماي، ەل بولاشاعى – جاس ۇرپاقتىڭ ساپالى دامۋىنا نەگىز قالايدى.
ەرتە ارالاسۋ – بۇل دامۋىندا بۇزىلىستارى بار نەمەسە ولاردىڭ تۋىنداۋ ءقاۋپى بار ەرتە جاستاعى بالالارعا (0 جاستان 3 جاسقا دەيىن) جانە ولاردىڭ وتباسىلارىنا قولداۋ كورسەتۋگە باعىتتالعان ءىس-شارالار مەن قىزمەتتەردىڭ كەشەنى. ەرتە ارالاسۋدىڭ نەگىزگى ماقساتى – بۇزىلىستاردىڭ سالدارىن بارىنشا ازايتۋ، بالانىڭ الەۋەتىن تولىق دامىتۋ جانە ونى قوعامعا بەيىمدەۋگە وڭتايلى جاعداي جاساۋ.
— ەرتە ارالاسۋدىڭ الەۋمەتتىك قىزمەتتەر ورتالىعىنىڭ باستى ەرەكشەلىگى - تەك بالالارمەن جۇمىس ىستەمەيدى، قاراپايىم كۇندەلىكتى ومىرلىك جاعدايلاردا وتباسى مۇشەلەرىمەن بىرلەسە وتىرىپ قارىم-قاتىناس ورناتامىز. ەرتە ارالاسۋدىڭ نەگىزگى قاعيداسى - وتباسىن قولداۋ، اتا-انالاردى كومەك كورسەتۋ پروسەسىنە بەلسەندى تارتۋ، بالانىڭ دامۋىنا جاعداي جاساۋعا جاردەمدەسۋ.
تاربيەلى ۇرپاق — ەلدىڭ ەرتەڭى. ال ەل ەرتەڭىن سەنىپ تاپسىراتىن ۇرپاقتىڭ بويىنا ىزگىلىك، ادامگەرشىلىك پەن ۇلتتىق قۇندىلىقتاردى سىڭىرۋدە وتباسىلىق تاربيەنىڭ ءرولى زور، — دەيدى جۇمىسپەن قامتۋ جانە الەۋمەتتىك باعدارلامالار باسقارماسىنىڭ "ەرتە ارالاسۋدىڭ الەۋمەتتىك قىزمەتتەر" ورتالىعىنىڭ ادىسكەر مامانى ز.جايلاۋوۆا.