بۇگىن - قازاقستاندا وتباسى كۇنى. مەملەكەت باسشىسى ەل حالقىن مەرەيلى كۇنمەن قۇتتىقتادى، - دەپ حابارلايدى Aqshamnews.kz.
"بۇل – ۇلتىمىزدى مەيىرىم مەن قامقورلىق، ءوزارا قولداۋ مەن ازاماتتىق جاۋاپكەرشىلىك سياقتى مىزعىماس قۇندىلىقتار اياسىندا ۇيىستىراتىن تاماشا مەرەكە. وتباسى – حالقىمىز ءۇشىن قاسيەتتى ۇعىم. ءار ادام، ەڭ الدىمەن، ءوزىنىڭ قاستەرلى شاڭىراعىندا تۇلعا رەتىندە قالىپتاسادى، ۇلگى-ونەگە الىپ، ناعىز ازاماتقا ءتان يگى قاسيەتتەردى بويىنا سىڭىرەدى. وتباسىندا كورگەن تالىم-تاربيەنىڭ ارقاسىندا ەلىمىزدە وتانشىل، ەڭبەكقور، ءبىلىمدى جانە مادەنيەتتى ۇرپاق ءوسىپ شىعادى. سوندىقتان ءبىز ءبارىمىز ءبىر ەل بولىپ حالقىمىزدىڭ ءسالت-داستۇرى مەن قازىرگى زامانداعى وزىق كوزقاراسى ۇيلەسىم تاپقان وتباسى قۇندىلىقتارىن ساقتاپ، ونى نىعايتىپ، جان-جاقتى ناسيحاتتاۋىمىز كەرەك. جارىق ءومىر سىيلاعان اتا-انالارىمىزعا زور قۇرمەتپەن قاراۋ – قاستەرلى پارىز. اسىرەسە، ايالى الاقانىمەن، اقىل-پاراساتىمەن ءاربىر ءۇيدى شۋاققا بولەيتىن انالاردىڭ ورنى ەرەكشە. «انا – جەر-انا» – ادامزات وركەنيەتىنىڭ وزەگى. ءبىز اسقار تاۋ اكەلەرىمىزدىڭ تاباندى ەڭبەگى مەن ەرەن ەرلىگىنە باس ءيىپ، ءقادىر تۇتۋىمىز كەرەك. ءار شاڭىراقتا ىرىس-ىنتىماق بولسا، ەلىمىز دە قارقىندى داميدى. بۇل – ادىلەتتى جانە قۋاتتى قازاقستان قۇرۋدىڭ اسا ماڭىزدى شارتى. سوندىقتان مەملەكەت وتباسى قۇندىلىقتارىن كەڭىنەن دارىپتەپ، انا مەن بالا قۇقىعىن قورعاۋعا ايرىقشا ءمان بەرەدى. ءار شاڭىراق باق-بەرەكەگە تولسىن! بارشا وتانداستارىمىزعا زور دەنساۋلىق، مول تابىس تىلەيمىن" - دەلىنگەن پرەزيدەنتتىڭ قۇتتىقتاۋىندا.