وتباسى بانكىندەگى دەپوزيتتى ەندى تەك تۋىستارعا عانا تابىستاۋعا بولادى. 21 تامىزدان باستاپ «وتباسى بانكتەگى» دەپوزيتتى ساتۋ قىزمەتى توقتاتىلادى، دەپ حابارلايدى Almaty-akshamy.kz. قازاقپارات سىلتەمە جاساپ.
«21 تامىزدان باستاپ وتباسى بانكىندە دەپوزيتتى اقىلى تۇردە تابىستاۋ (دەپوزيتتى ساتۋ) قىزمەتى توقتاتىلادى. ونلاين تابىستاۋ – دەپوزيتتەردىڭ ونلاين دۇكەنى ىسپەتتەس. وندا كليەنتتەردىڭ ءبىرى سالىمدارىن ساتا السا، ەكىنشىلەرى جيناقتاۋ جولىن جىلدامداتىپ، زاەمدى تەزىرەك الۋ ءۇشىن وتباسى بانكىنەن شوت ساتىپ الا الادى. بىلتىردىڭ ءبىرىنشى جارتىسىندا بۇل مۇمكىندىكتى 1 647 ادام پايدالانعان. بيىلدىڭ ءدال وسى كەزەڭىندە دەپوزيتتەردى ساتىپ الىپ، زاەم راسىمدەگەن بىرەگەي كليەنتتەردىڭ سانى ەكى ەسە ازايىپ، 973 ادام بولدى. ال ءبىرىنشى جارتىجىلدىقتا وتباسى بانك 28 800 كرەديت بەرگەن»، - دەلىنگەن اتالعان بانك مالىمەتىندە.
بانك اقپاراتىنا قاراعاندا، تەك بيىلعى جىلدىڭ باسىنان بەرى 273 465 قازاقستاندىق جاڭا جيناق شوتىن اشتى.
«وتباسى بانكىندە دەپوزيتتەردى تۋىستارعا تابىستاۋ قىزمەتى ساقتالادى. ونى تەك بانك بولىمشەلەرىندە عانا ەمەس، «Otbasy bank» ءموبيلدى قوسىمشاسىندا ونلاين رەجيمىندە دە جاساۋعا بولادى. قىزمەت 5-10 مينۋت ۋاقىتتى الادى»، - دەپ ناقتىلادى بانك.
بۇل قىزمەتتى تۋىستاردىڭ كەلەسى ساناتتارى پايدالانا الادى: ايەلى-كۇيەۋى، اتا-اناسى، بالالارى، اسىراپ الۋشىلار، اسىراپ الىنعان بالالار، ءبىر اتا-انادان نەمەسە ءارتۇرلى اتا-انادان تۋعان اعا-ىنىلەرى مەن اپا-سىڭلىلەرى، اتاسى، اجەسى، نەمەرەلەرى جانە باسقا دا جاقىن تۋىستارى.
اتاپ ايتقاندا، بانك بولىمشەسىنە بارىپ، تۋىستىق قاتىناسى جوق، ءبىراق ورتاق تۋىستارى بار ادامدار اراسىندا دەپوزيتتەردى تابىستاۋعا بولادى. مىسالى، سالىمشى ءبىر مامىلە اياسىندا جارىنىڭ اعاسىنا ءوز دەپوزيتىن تابىستاي الادى. ول ءۇشىن نەكە جانە تۋىستىق قاتىناستى راستايتىن قۇجاتتار (تۋۋ تۋرالى كۋالىكتەر) قاجەت.