وتانىمىزدىڭ جاقسىلىق پەن دامۋدىڭ داڭعىل جولىنا تۇسكەنى قۋانتادى - راۋشان سارتايەۆا

كوپتىڭ كۇتكەنى دە وسى رەفەرندۋم ارقىلى جۇزەگە اساتىن وزگەرىستەر

وتانىمىزدىڭ جاقسىلىق پەن دامۋدىڭ داڭعىل جولىنا تۇسكەنى قۋانتادى. بۇل تۋرالى فيلوسوفيا عىلىمدارىنىڭ كانديداتى راۋشان سارتايەۆا ايتتى، دەپ حابارلايدى Almaty-akshamy.kz.

 «بۇل ءۇشىن ۇلكەن قوزعالىس كەرەك بولعان. بىزدىڭشە كوپتىڭ كۇتكەنى دە وسى رەفەرندۋم ارقىلى جۇزەگە اساتىن وزگەرىستەر دەپ ۇعامىز. بۇل توڭىرەگىندە جىل باسىندا ساياساتتانۋ، فيلوسوفيا جانە ءدىنتانۋ ينستيتۋتىندا تالقىلاعانبىز. جاڭا وزگەرىستىڭ ورىن العانىن قالاعانبىز. ول جاعى قازىرگى تاڭدا ورىندالدى.

قازاقستاننىڭ رەاليزاسيالىق، مودەرنيزاسيالىق تۇرعىدان دامىعانىن بارشامىز قۇپتايمىز. كەيبىر كىسىلەر 1993 جىلعى العاشقى كونستيتۋسيانى قايتارۋدى دا ايتىپ ءجۇر. ەندىگى ءبىر كىسىلەر بۇگىنگى قولدانىستاعى زاڭداردى قاتايتايىق دەگەندى العا تارتادى. ارينە، قىزۋ پىكىر تالاس كوپ-اق. دەسەدە، قازىرگىدەي الماعايىپ زاماندا پرەزيدەنتتىك-پارلامەنتتىك باسقارۋ ۇلگىسىن قۇپتاعان بولار ەدىك. بۇل ۋاقىت تالابى بولىپ تۇر.

مەملەكەت باسشىسى دا تاريحي ءساتتىڭ ۇستىندە تۇرعانىمىزدى سەزىنۋدە. سوندىقتان جەكە بىرەۋلەردىڭ قالتاسى ءۇشىن ەمەس، مەملەكەت بولاشاعىنا قىزمەت ەتكەن دۇرىس. سوندا جاستارعا ايقىن باعىت-باعدار ۇسىنا الامىز. قاستەرلى وتانىمىز بارشامىزدىڭ پانامىز دەمەكپىن»،-دەدى ر. سارتايەۆا.