الماتى №4 قالالىق كلينيكالىق اۋرۋحاناسىندا روبوت كومەگىمەن تىزە جانە جامباس بۋىندارىن اۋىستىرۋ بويىنشا وتالار جاسالاتىن بولادى
الماتى №4 قالالىق كلينيكالىق اۋرۋحاناسى (№4 قكا) روبوتتىڭ قاتىسۋىمەن قازاقستاندا العاشقى ورتوپەديالىق وپەراسيالاردىڭ جاسالاتىنى تۋرالى حابارلايدى. 2023 جىلدىڭ 7 قاراشاسى قازاقستاننىڭ مەديسينالىق تاجىريبەسىندە ايتۋلى كۇن.
ورتوپەديا سالاسىنىڭ تانىمال مامانى ميرامبەك جۇماعۇلوۆتىڭ جەتەكشىلىگىمەن جانە پريوروۆ اتىنداعى عىلىمي-مەديسينالىق زەرتتەۋ ورتالىعى (ماسكەۋ) مامانى الەكسەي شۋمسكييدىڭ قاتىسۋىمەن، جالپى تىزە مەن جامباس بۋىندارىن ەندوپروتەزدەۋ، سونداي-اق تىزە بۋىنىن ءبىر ايدارشىقتى پروتەزدەۋدى قامتيتىن العاشقى وپەراسيالار جاسالدى.
روبوتتى پايدالانعان كەزدە ەمدەۋ ءار ناۋقاسقا جەكە ءتاسىل ءپرينسيپى بويىنشا جۇرگىزىلەدى، روبوت وپەراسياعا دەيىن يمپلانتتىڭ وڭتايلى ولشەمىن جانە ونى ورناتۋدىڭ ناقتى ورنىن تاڭداي وتىرىپ، جاساندى بۋىننىڭ ءدال 3D جوسپارلاۋىن ورىندايدى.
«قاراشانىڭ 3ء-ى مەن 7ء-سى ارالىعىندا ءبىز قازاقستاندا روبوتتىڭ كومەگىمەن تىزە جانە جامباس بۋىندارىن اۋىستىرۋ بويىنشا العاشقى وپەراسيالاردى جاسادىق. ءبىز ەندوپروتەزدەۋگە مۇقتاج 9 ناۋقاستى تاڭدادىق. ۇمىتكەرلەردى مۇقيات ىرىكتەۋ بىرنەشە اي بويى جۇرگىزىلدى. دارىگەرلەر كونسيليۋمى ءوتىپ، جاساندى بۋىندى ءدال 3D جوسپارلاۋ ءۇشىن كت زەرتتەۋدىڭ سيفرلىق ناتيجەلەرى اقش ماماندارىنا جىبەرىلدى. روبوتتى قولدانۋدىڭ ارقاسىندا وپەراسيا ءدال جوسپارلانعانداي - 1 مم-دەن از قاتەلىكپەن جۇزەگە اسىرىلادى. سونداي-اق جۇمساق تىندەردىڭ جاقسىراق ساقتالۋى قامتاماسىز ەتىلىپ، بايلام اپپاراتىنىڭ وڭتايلى تەپە-تەڭدىگىنە قول جەتكىزىلەدى»، - دەيدى الماتى №4 قكا حيرۋرگيا بولىمشەسىنىڭ مەڭگەرۋشىسى ميرامبەك جۇماعۇلوۆ.
Stryker كومپانياسى ۇسىنعان Mako تەحنولوگياسى دالىرەك جانە بولجامدى حيرۋرگيالىق ناتيجە بەرەدى، قالپىنا كەلتىرۋ ۋاقىتىن قىسقارتادى جانە پروتەزدىڭ ۇزاق مەرزىمىن قامتاماسىز ەتەدى. Mako تەحنولوگياسىن قولدانا وتىرىپ، ءبىر ايدارشىقتى ەندوپروتەزدەۋ جاساتقان ناۋقاستار ونىڭ جاراقاتى از ەكەنىن، بەلسەندى ءومىر سالتىنا تەز ورالۋ مۇمكىندىگىن جانە «قالىپتى» بۋىن سەزىمىنە جاقىنداۋ مۇمكىندىگىن اتاپ وتەدى.
«بۇل تەحنولوگيا دامىعان ەلدەردە تانىمال، ونى اقش، كانادا، جاپونيا، كورەيانىڭ جەتەكشى كلينيكالارىندا قولدانىپ كەلەدى. الماتى قالاسى اكىمدىگىنىڭ قولداۋىمەن ءبىز بۇگىن قازاقستاندا روبوتتىڭ كومەگىمەن تىزە جانە جامباس بۋىندارىن اۋىستىرۋ العاشقى وتالارىن جاسادىق – بۇل يننوۆاسيالىق ورتوپەديا ءۇشىن ءارى تراۆماتولوگيالىق-ورتوپەديالىق كومەكتى جەتىلدىرۋدىڭ جاڭا كەزەڭى. جىل سايىن مۇنداي وپەراسيانى قاجەت ەتەتىن ناۋقاس سانى ارتىپ كەلەدى. ماسەلەن وسى جىلدىڭ 10 ايىندا ءبىزدىڭ اۋرۋحانادا ءبىر جارىم مىڭنان استام بۋىن اۋىستىرۋ وتاسى جاسالدى. ءبىزدىڭ ماقساتىمىز – قىزمەتىمىزدى جەتىلدىرىپ، ساپالى مەديسينالىق كومەك كورسەتۋ»، – دەيدى الماتى №4 قكپ ديرەكتورى، م.ع.ك.، MBA، DBA، پروفەسسور ءبىرجان دوسمايلوۆ.
الماتى №4 قكا شۇعىل جانە جوسپارلى نەگىزدە مامانداندىرىلعان، جوعارى تەحنولوگيالىق مەديسينالىق كومەك كورسەتەتىن كوپبەيىندى كلينيكا. 2012 جىلى اۋرۋحانادا جامباس، تىزە، يىق، شىنتاق بۋىندارىن اۋىستىرۋ بويىنشا حالىققا كومەك كورسەتەتىن، سونىمەن قاتار اياق-قولدىڭ ءىرى بۋىندارىنداعى ەندوپروتەزدى تولىق جانە جارتىلاي اۋىستىرۋدى جۇزەگە اسىراتىن مامانداندىرىلعان ەندوپروتەزدەۋ بولىمشەسى اشىلدى. ەندوپروتەزدەۋ تاجىريبەسى 1975 جىلى چۋچۋلو اناتوليي نيكولايەۆيچتىڭ №4 قكا-دا جامباس بۋىنىن ءبىر پوليۋستى ەندوپروتەزدەۋ وپەراسياسىن جاساعان كەزدەن باستاۋ الادى. وسى جىلدار ىشىندە 20000-نان استام پاسيەنتكە بۋىن اۋىستىرۋ وپەراسياسى جاسالعان. وسى جىلدىڭ باسىنان بەرى №4 قكا-دا 1526 بۋىن اۋىستىرۋ وتاسى جاسالدى. 2022 جىلى 1648 ەندوپروتەزدەۋ وپەراسياسى جاسالعان.