قازاقستاندىق عالىمدار ويلاپ تاپقان بىرەگەي ازىرلەمەسى كەڭ تارالعان اۋرۋلاردان بولاتىن ءولىم-جىتىم مەن مۇگەدەكتىكتى تومەندەتۋگە مۇمكىندىك بەرەدى.
جەرگىلىكتى ونەرتابىس تامىرلاردىڭ وتىمدىلىگىن قالپىنا كەلتىرۋگە مۇمكىندىك بەرەدى. بۇگىندە عىلىمي ورتالىقتىڭ قىزمەتكەرلەرى قازاقستاندىق جانە ەۋرازيالىق سالالىق ۆەدومستۆونىڭ پاتەنتتەرىن الدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
"ءبىز جاساعان قۇرىلعى قان تامىرىنداعى اتەروسكلەروتيكالىق تۇيىنشەكتەردى تۇبەگەيلى الىپ تاستاۋعا مۇمكىندىك بەرەدى. قاراپايىم تىلمەن ايتقاندا، ارتەريانى تازارتادى. قۇرىلعىنى تامىرعا ءبىر ەنگىزگەندە بىردەن بىرنەشە ارتەريانى تازالاۋعا بولادى. ەكىنشىدەن، تۇيىرشەك ءتۇزىلۋىنىڭ الدىن الۋ ماقساتىندا بىر-ەكى جىلدان كەيىن تاعى ءبىر قايتالاۋعا بولادى. بۇل وپەراسيانى بىرنەشە مارتە قايتالاپ جاساۋعا بولادى. تەك ستەنت ورناتۋ كەزىندە جاساۋعا رۇقسات ەتىلمەيدى. ارتەرياعا ستەنت ورناتسا، ول ءومىر بويى قالىپ قويادى. كەيىن كوپتەگەن اسقىنۋلارعا الىپ كەلەتىنىن بىلەمىز"، - دەيدى تامىر پاتولوگياسى ورتالىعىنىڭ ديرەكتورى ورالباي دارمەنوۆ.
وتاندىق ونەرتابىس قولدانىسقا ەنگىزىلسە، كەلەشەكتە تامىرلاردى ستەنتتەۋ، سونداي-اق جۇرەك، مي، اياقتاعى كۇرەتامىرلارعا كۇردەلى وپەراسيالاردان باس تارتۋعا بولادى. ەمنىڭ بۇل ءتۇرى جەڭىلىرەك وتەدى، ناتيجەسى دە جاقسى.
"ءبىزدىڭ قۇرىلعىمىز – الەمدىك جاڭالىق. بولاشاقتا ول ستەنتتەۋ جانە شۋنتتاۋ ادىستەرىن قولدانىستان شىعارۋعا ىقپال ەتەدى دەپ ويلايمىز. بۇل ءادىستى قان تامىرلارىنىڭ اتەروسكلەروتيكالىق زاقىمدانۋى بار ادامدار قولدانا الادى. اتەروسكلەروز اۋرۋى ءقازىر ءجيى كەزدەسەدى. 40 جاستاعىلاردىڭ اراسىندا ءاربىر ءتورتىنشى ادامدا، 60 جاستاعىلاردىڭ اراسىندا ءاربىر ەكىنشى ادامدا وسى اۋرۋ انىقتالادى"، - دەيدى تامىر پاتولوگيا ورتالىعىنىڭ ديرەكتورى ورالباي دارمەنوۆ.
جاڭاشا ەمدەۋ پروسەدۋراسى قازاقستاندىقتار ءۇشىن اسا قىمباتقا تۇسپەيدى. ۇقساس ادىستەرگە قاراعاندا ونىڭ قۇنى الدەقايدا تومەن. ءقازىر قۇرىلعىنىڭ زەرتحانالىق جانە ونەركاسىپتىك ۇلگىلەرى دايىندالۋ ۇستىندە. بۇل كلينيكالىق زەرتتەۋلەر جۇرگىزىپ، كوممەرسيالىق ءوندىرىستى جولعا قويۋ ءۇشىن قاجەت.