بۇل سەناتور بيبىگۇل جەكسەنبايدىڭ ءسوزى.
سەناتور بۇگىن كورەرمەن جات ەلدىڭ يدەولوگياسىن ساناسىنا ءسىڭىرىپ جاتىر دەگەن ماسەلە كوتەردى، دەپ حابارلايدى Almaty-akshamy.kz
بيبىگۇل جەكسەنباي بۇل تۋرالى ءاليحان سمايىلوۆقا جولداعان دەپۋتاتتىق ساۋالىندا ايتتى.
"بيىل ناۋرىز ايىندا قابىلدانعان اقپاراتتىق دوكترينادا "تەليەۆيزيا مەن راديو اۋديتورياسى ەڭ اۋقىمدى، ەڭ ىقپالدى اقپارات كوزدەرىنىڭ ءبىرى بولىپ قالا بەرەدى، وتاندىق تەلە جانە راديوستانسيالارعا ءتيىستى كوڭىل بولىنگەن جاعدايدا ولاردىڭ شەتەلدىك مەديا الپاۋىتتارىمەن باسەكەگە تۇسۋگە مۇمكىندىك بەرەتىندەي الەۋەتى بار" دەلىنگەن. قازاقستاندا تىركەلگەن 83 تەلەراديوكومپانيانىڭ 21ء-ى رەسپۋبليكالىق دەڭگەيدە حابار تاراتادى. ونىڭ تەك 15ء-ى مۋلتيپلەكسكە تەگىن ەنىپ، حابار تاراتىپ وتىر. ال، قازاقستاندىق كورەرمەندەرگە ۇسىنىلعان شەتەلدىك تەلەارنالار سانى 300-گە جۋىقتادى. جاسىراتىنى جوق، قازىرگى تاڭدا سىرتتان اعىلعان اقپاراتتىق-ناسيحاتتىق ينەكسيالاردىڭ كۇشەيۋى نازار اۋدارتادى. اسىرەسە شەكارالىق ايماقتاردىڭ تۇرعىندارى ءۇشىن شەتەلدىك اقپارات كوزى ۇيرەنشىكتى بولعان"، - دەدى سەنات دەپۋتاتى.
سوزىنشە، قازاقستاندا سيفرلىق-ەفيرلىك تەلەديدارعا كوشۋ 2015 جىلعا دەيىن جوسپارلانعانىمەن، بۇل جۇمىستار سوزىلىپ كەتكەن.
"سيفرلىق-ەفيرلىك تەلەديدارعا كوشسەك، رەسپۋبليكالىق ماڭىزى بار قالالار مەن وبلىس ورتالىقتارىندا 30 ارناعا دەيىن، ال وبلىس ورتالىقتارىنان شالعاي ەلدىمەكەندەردە 15 ارناعا دەيىن تەلەارنالاردى ترانسلياسيالاۋعا مۇمكىندىك پايدا بولىپ، ەكىنشى-ۇشىنشى مۋلتيپلەكس قوسىلىپ، وتاندىق تەلەارنالاردىڭ دامۋىنا زور مۇمكىندىك اشىلادى دەگەن ۋادە بولعان. الايدا، ازىرگە مەملەكەتتىك ارنالاردان باسقالارى ءۇشىن مۋلتيپلەكستە حابار تاراتۋ ارمان بولىپ وتىر. وڭىرلىك، اسىرەسە شەكارالىق اۋماقتاعى جەكەمەنشىك تەلەارنالار ودان ءارى ورىن الا المايدى. سەبەبى باعاسى ۋداي قىمبات. ياعني جەكەمەنشىك ارنالاردىڭ دامۋىنا، وتاندىق كونتەنتتىڭ كوبەيۋىنە ءوزىمىز كەدەرگى جاساپ وتىرمىز"، - دەدى ول.
بيبىگۇل جەكسەنباي رەسپۋبليكالىق تەلەارنالارعا بالاما ىزدەگەن كورەرمەننىڭ قازاقستانمەن شەكارالاس ەلدەردىڭ تەلەارنالارىنا تەلمىرىپ، جات ەلدىڭ يدەولوگياسىن ساناسىنا ءسىڭىرىپ جاتقانىن باسا ايتتى.
"ءبىر وكىنىشتىسى، OTAU TV ارقىلى وتاندىق تەلەارنالارىمىز وزگە ەلگە حابار تاراتۋىنا شەكتەۋ بولعانىمەن، تاۋەلسىزدىك العان جىلدارى ءبىز الىس-جاقىن شەت ەلدەردىڭ بۇقارالىق اقپارات قۇرالدارىنىڭ قازاقستان اۋماعىنا تارالۋىنا كەڭ مۇمكىندىك جاسادىق. ءقازىر سيفرلىق ەفيرلىك تەلەديدار قازاقستان حالقىنىڭ 92،66 پايىزىنا قولجەتىمدى. ەلىمىز سيفرلىق حابار تاراتۋعا كوشكەنىمەن، وڭىرلەردەگى جەكەمەنشىك تەلەارنالار بۇرىنعى بەيشارا كۇيىندە قالىپ وتىر. اقپارات تاراتاتىن تەلەارنا دامىماسا، يدەولوگيا دا بولمايدى. يدەولوگيا دەگەنىمىز تەك استانا، الماتىدا عانا ەمەس، كۇللى وڭىرلەردە جۇرگىزىلۋى ءتيىس"، - دەپ اتاپ ءوتتى سپيكەر.
بيبىگۇل جەكسەنباي قازاقستاننىڭ قورعانىس سالاسىنا قىرۋار قاراجات بولەتىنىن، الايدا قورعانىسقا قانشا قاراجات بولسەك تە، ونىڭ تيىمدىلىگى تومەن ەكەنىن ايتىپ وتىر.
وسى ماسەلەگە قاتىستى دەپۋتات ءبىرقاتار ۇسىنىس ايتتى.
"ۇكىمەتكە وڭىرلىك، اسىرەسە شەكارالىق اۋماقتاردا اقپاراتتىق قاۋىپسىزدىك كۇشەيتىپ، جەرگىلىكتى وتاندىق كونتەنتتى كوبەيتۋ ءۇشىن وڭىرلەردەگى جەكە تەلەارنالار وگەيدىڭ كۇيىن كەشپەي، باسەكەلەستىك كۇرەستە كۇش-قۋاتىن ارتتىرۋىنا جان-جاقتى قولداۋدى قاراستىرۋ قاجەت. مۋلتيپلەكسكە شەكارالىق ايماقتارداعى جەكە مەنشىك تەلەارنالاردىڭ دا قوسىلۋىنا جاعداي جاساپ، باعا ساياساتىن رەتتەۋگە كوڭىل بولىنگەن ءجون. شەكارالاس ەلدەردەگى قانداستارىمىزدىڭ قازاقستان حابارلارىن كورۋگە سپۋتنيكتىك تارالۋ مۇمكىندىگىن كەڭەيتۋدى قاراستىرۋ كەرەك"، - دەپ اتاپ ءوتتى سەنات دەپۋتاتى بيبىگۇل جەكسەنباي.