81 بالانى يت قاپقان.
وقۋ-اعارتۋ ۆيسە-مينيسترى ەدىل وسپاننىڭ ايتۋىنشا، اكىمدىكتەر قاڭعىعان يت ماسەلەسىن دۇرىس شەشىپ وتىرعان جوق، دەپ حابارلايدى Almaty-akshamy.kz
بۇگىن سەنات كۋلۋارىندا وقۋ-اعارتۋ ۆيسە-مينيسترى ەدىل وسپان بالالاردى بۇرالقى يتتەر تالاپ جاتقانىن، بۇل ماسەلەنى اكىمدىكتەر شەشۋى كەرەك ەكەنىن، بۇگىندە بۇعان بارلىق مۇمكىندىك بار ەكەنىن ايتتى.
ۆيسە-مينيستر ءار مەملەكەتتىك ورگان ءوز جۇمىسىن اتقارۋ كەرەك ەكەنىن، اكىمدىكتەر بالالاردى قاڭعىعان يتتەردەن قورعاۋدى قامتاماسىز ەتۋى كەرەك ەكەنىن باسا ايتتى.
"اۋلاۋعا بولادى، قاڭعىعان يتتەرگە قاتىستى شارالار قاراستىرىلعان ەمەس پە ەدى؟ وسىنى باقىلاۋعا الىپ، جۇمىستى ۇيىمداستىرۋ كەرەك. ءبىز باسقا مەملەكەتتىك ورگاندار الدىندا ماسەلە كوتەرىپ وتىرمىز. 81 بالا زارداپ شەكتى، ۇشەۋى كوز جۇمدى. تۇركىستان، اقتوبە وبلىستارى، الماتى قالاسىندا. بۇگىنگى كۇنى بارلىق مۇمكىندىك بار، ۋاكىلەتتى مەملەكەتتىك ورگاندار (قايعىلى جاعدايلارعا – رەد.) جول بەرمەۋى كەرەك سوندىقتان بارلىق مەملەكەتتىك ورگانداردى بالالاردىڭ قۇقىعىن قورعاۋ ءۇشىن ءتيىستى شارالار قابىلداۋعا شاقىرامىز"، دەدى ەدىل وسپان.
2023 جىلعى 6 جەلتوقساندا ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا قاڭعىعان يتتەرگە قاتىستى ماسەلە كوتەردى. ونىڭ ايتۋىنشا، وسى جىلدىڭ ءبىرىنشى جارتىجىلدىعىندا ەلدە قاڭعىعان يتتەر 81 بالانى قاپقان، سونىڭ سالدارىنان ءۇش ءبۇلدىرشىن كوز جۇمدى.