وتكەن ايدا ەلىمىزدە 10 753 جاڭا اۆتو ساتىلعان.
قازاقستان اۆتوبيزنەس قاۋىمداستىعىنىڭ مالىمەتىنشە، بۇل كورسەتكىش 2021 جىلدىڭ ناۋرىز ايىنداعى دەڭگەيدەن ايتارلىقتاي جوعارى، دەپ حابارلايدى Almaty-akshamy.kz
بىلتىر وسى كەزەڭدە 8 000 مىڭنان اسا كولىك ساتىلدى. بۇل رەتتە، ەگەر 2019 جىلدىڭ باسىنداعى ستاتيستيكانى الاتىن بولساق، وندا ترانزاكسيالار كولەمى تەك ءبىر رەت – 2021 جىلدىڭ ماۋسىمىندا (12025) جوعارى بولعان.
دەگەنمەن ناۋرىزداعى جاقسى ناتيجەلەرگە قاراماستان، ازىرگە ساتىلىم كولەمى وتكەن جىلدان تومەن. قازاقستان اۆتوبيزنەس قاۋىمداستىعىنىڭ مالىمەتىنشە، I توقساندا 22 419 اۆتو ساتىلدى. 2021 جىلدىڭ قاڭتار-ناۋرىز ايلارىندا بۇل كورسەتكىش 24 196 بىرلىك بولاتىن.
بۇل قاڭتار ايىنداعى نارىقتىڭ تۇرالاۋىنا (4 مىڭ بىرلىكتەن از) بايلانىستى بولسا كەرەك. ءبىراق قاۋىمداستىق الداعى ۋاقىتتا ساتىلىم وسەدى دەپ ەسەپتەيدى. وعان نەگىزگى العىشارتتار وتاندىق ءوندىرىستى ۇلعايتۋ، نارىققا جاڭا برەندتەردىڭ كەلۋى، يمپورتتاۋشىلار ۇسىناتىن قارجىلاندىرۋ باعدارلامالارى، سونداي-اق جەڭىلدەتىلگەن نەسيەلەندىرۋ باعدارلاماسى بولىپ تابىلادى.
ەسكە سالا كەتسەك، الداعى ۋاقىتتا ەلىمىزدە جەڭىلدەتىلگەن اۆتونەسيە باعدارلاماسى ىسكە قوسىلماق. ول قازاقستاندىقتارعا 7 جىلعا، جىلدىق 4%-بەن وتاندىق كولىك ساتىپ الۋعا مۇمكىندىك بەرەدى.