وزبەكستان – قازاقستاننىڭ ورتالىق ازيا وڭىرىندەگى نەگىزگى ساۋدا سەرىكتەسى
قازاقستان مەن وزبەكستان ۇكىمەتتەرى قازاقستاندا وندىرىلگەن اۆتوموبيلدەردى وزبەكستانعا جەتكىزۋگە كۆوتا ءبولۋ، قازاقستاندىق ۇن ءترانزيتى ءۇشىن وزبەك تاراپىنان اۋعانستانعا جەڭىلدىكتەر بەرۋ مۇمكىندىگىن قاراستىردى، دەپ حابارلايدى Almaty-akshamy.kz.
رrimeminister.kz سايتىندا ءمالىم ەتىلگەندەي، پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين وزبەكستان پرەمەر-مينيسترىنىڭ ورىنباسارى – ينۆەستيسيالار جانە سىرتقى ساۋدا ءمينيسترى ءجامشيد حودجايەۆپەن كەزدەستى.
تاراپتار جەمىس-كوكونىس ونىمدەرىن فورۆاردتىق ساتىپ الۋ بويىنشا تەتىكتەردى جاساۋ، قازاقستاندا وندىرىلگەن اۆتوموبيلدەردى وزبەكستانعا جەتكىزۋگە كۆوتا ءبولۋ، وزبەك تاراپىنىڭ اۋعانستانعا قازاقستاندىق ۇن ترانزيتىنە جەڭىلدىكتەر بەرۋ مۇمكىندىگى، اۋە رەيستەرىنىڭ جيىلىگىن ارتتىرۋ جانە باسقا دا كوپتەگەن باعىتتار بويىنشا ىنتىماقتاستىق ماسەلەلەرىن تالقىلادى.
ەكىجاقتى كەزدەسۋ بارىسىندا «ورتالىق ازيا» حالىقارالىق ونەركاسىپتىك كووپەراسيا ورتالىعىن قۇرۋ جوباسىنا ەرەكشە نازار اۋدارىلدى. تاراپتار جىل سوڭىنا دەيىن جوبانى ىسكە اسىرۋدى باستاۋ ءۇشىن قۇقىقتىق نەگىزدى قالىپتاستىرۋ پروسەسىن اياقتاۋعا كەلىستى. قازىرگى ۋاقىتتا الەۋەتتى قازاقستاندىق ينۆەستور حالىقارالىق ونەركاسىپتىك كووپەراسيا ورتالىعى جوباسىنا باسقارۋشى كومپانيا رەتىندە قاتىسۋعا جانە ءوز قارجىلاندىرۋى ەسەبىنەن ونى ىسكە اسىرۋعا بەلسەندى قىزىعۋشىلىق تانىتىپ وتىر.
ەسكە سالايىق، «ورتالىق ازيا» حالىقارالىق ونەركاسىپتىك كووپەراسيا ورتالىعىن قۇرۋ جوباسى – الداعى 5 جىلدا قازاقستان رەسپۋبليكاسى مەن وزبەكستان رەسپۋبليكاسى اراسىنداعى تاۋار اينالىمىن 10 ملرد دوللارعا دەيىن جەتكىزۋ بويىنشا پراكتيكالىق ءىس-قيمىل جوسپارىنىڭ («جول كارتاسى») نەگىزگى ەلەمەنتتەرىنىڭ ءبىرى. جوبا ۇزاق مەرزىمدى. «ورتالىق ازيا» حالىقارالىق ونەركاسىپتىك كووپەراسيا ورتالىعىن قۇرۋ جونىندەگى بىرلەسكەن ءىس-شارالار جوسپارىنا سايكەس 3 نەگىزگى كەزەڭدى جانە 20 ناقتى ءىس-شارانى قامتيدى.
وزبەكستان – قازاقستاننىڭ ورتالىق ازيا وڭىرىندەگى نەگىزگى ساۋدا سەرىكتەسى. 7 ايدىڭ قورىتىندىسى بويىنشا ءوزارا ساۋدا-ساتتىق 26،3% ءوستى.