بۇل – ۇلتتىق كينونى قولداۋ ورتالىعىنىڭ مالىمدەمەسى.
بۇگىندە ءار جىلدارى تۇسىرىلگەن 29 تولىقمەتراجدى فيلم دايىن تۇر، دەپ حابارلايدى Almaty-akshamy.kz ورتالىقتىڭ مالىمەتىنە سىلتەمە جاساپ.
ولاردىڭ ىشىندە اسحات كۋچينچيرەكوۆتىڭ "باۋىرىنا سالۋ"، دارحان تولەگەنوۆتىڭ "اعايىندى"، كەنجەبەك شايقاقوۆتىڭ "ايقاي"، سەرىك اپرىموۆتىڭ "اۋىل" جانە تاعى باسقا فيلمدەر بار
بۇگىندە ءار جىلدارى تۇسىرىلگەن 29 تولىقمەتراجدى فيلم دايىن تۇر. ولاردىڭ جارتىسى ەندى عانا اياقتالىپ جاتسا، بۇعان دەيىن تۇسىرىلگەن كەي تۋىندىلار ءتۇرلى سەبەپكە بايلانىستى ءالى دە پروكاتقا شىقپاعان. ەكرانعا شىقپاعان تۋىندىلاردىڭ قاتارىندا ءتىپتى 2019 جىلعى كونكۋرستىڭ ناتيجەسىندە تۇسىرىلگەن فيلمدەر بار. اۆتورلاردىڭ كوبى فەستيۆالدەرگە قاتىسامىن دەپ ۇزاق ۋاقىت ءجۇرىپ قالعانىن ايتىپ وتىر. بۇعان قوسا تاريحي وقيعالارعا نەگىزدەلگەن، ۇلى تۇلعالاردىڭ مەرەيتويىنا ارنالعان جوبالار دا جەتەرلىك.
ورتالىقتىڭ باسقارما ءتوراعاسى قۇرمانبەك ءجۇماعاليدىڭ ايتۋىنشا، كەيبىر كينوگەرلەر باستاپقىدا مەملەكەت قاراجاتىنا فيلم ءتۇسىرۋ ءۇشىن ءوز جوباسىن اسىرا ماقتاپ، كونكۋرستان جولداما العان. ءبىراق سوڭىندا جوبانى ودان ءارى ىلگەرىلەتۋ جۇمىستارىنان وزدەرى باس تارتقان.
"بۇل دەگەنىمىز، ولاردىڭ مەملەكەتتىك قارجىعا دەگەن تەك تۇتىنۋشىلىق كوزقاراسىن كورسەتەدى. ەگەر ءفيلمنىڭ كورەرمەنگە جەتۋى اۆتورلاردىڭ وزىنە قىزىق بولماسا، ونى ءتۇسىرىپ نە قاجەت؟ مۇنداي كومپانيالار مەن اۆتورلار بويىنشا ورتالىق بولاشاقتا ءبىر شەشىم شىعارادى"، - دەيدى جۇماعالي.
ال اۆتورلىق فيلمدەردىڭ ورنى بولەك. ولار كەمىندە ءبىر جىل حالىقارالىق فەستيۆالدەردى ارالاپ، ۋاقىتىن وتكىزىپ الادى. ءارى مۇنداي تۋىندىلاردىڭ پروكاتقا شىعۋى دا قيىن. سەبەبى قاراپايىم كورەرمەندەر اۆتورلىق كينولارعا كوپ بارا بەرمەيدى. دەگەنمەن ونى ىزدەپ ءجۇرىپ كورەتىن كينوسۇيەر قاۋىم بار. اۆتورلىق فيلمدەردىڭ ىشىندە اسحات كۋچينچيرەكوۆتىڭ "باۋىرىنا سالۋ"، دارحان تولەگەنوۆتىڭ "اعايىندى"، كەنجەبەك شايقاقوۆتىڭ "ايقاي"، سەرىك اپرىموۆتىڭ "اۋىل" جانە تاعى باسقا فيلمدەر بار. وسى كارتينالار دا پروكاتقا كەلەسى جىلى شىعادى.
بۇدان بولەك، "ەۆا. باتىر قىز" سەكىلدى دەرەكتى كارتينا سوڭعى جارتىجىلدىقتا 13 حالىقارالىق كينوفەستيۆالدەن جۇلدەلى ورالدى. باقىتتاس سانيتاستىڭ "تەزەك" كارتيناسى بويىنشا ايگىلى "Netflix" كومپانياسىمەن كەلسىسسوز جۇرگىزىلىپ جاتىر. ءادىلحان ەرجانوۆتىڭ "ءمۇيىزتۇمسىق" اتتى كينوسىنىڭ الەمدىك پرەمەراسى كەلەسى جىلى بەدەلدى روتتەردام كينوفەستيۆالىندە وتەدى.