جەرگىلىكتى دۋبلەرلار بولليۆۋدتاعى اۋقىمدى جوبانىڭ تۇسىرىلىمىنە اتسالىسۋعا نيەتتى
ءقازىر ولار جاساندى قويىلىمدار توپتاماسىن دايىنداۋ ۇستىندە. جوبا تاپسىرىس بەرۋشى تاراپىنان ماقۇلدانسا، كەلەر جىلدان ءتۇسىرىلىم جۇمىستارى باستالماق، دەپ حابارلايدى Almaty-akshamy.kz
ونداعى كۇردەلى ءارى اسەرلى كورىنىستەرگە 5 قازاقستاندىق جانە 30 ءۇندىستاندىق كاسكادەر قاتىسادى دەپ كەلىسىلگەن.
«بۇل جولى مەن ەكشن ديرەكتور رەتىندە شاقىرتۋ الدىم. ياعني ءوزىمنىڭ كومانداممەن، وپەراتورلار توبىممەن ەكشن كورىنىستەردى باستان-اياق ءتۇسىرۋدى سەنىپ تاپسىرىپ وتىر. بۇل بىزگە بەرىلگەن ۇلكەن باعا دەپ بىلەمىن. بۇل – اسا اۋقىمدى ءارى كۇردەلى جوبا. كينو ءۇندىستان مەن پاكىستان اراسىندا بولعان سوعىس ۋاقىتىندا اكە مەن بالا وقيعاسىن باياندايدى. وندا ماحاببات بار، دەگەنمەن جەلىسى نەگىزىنەن شىتىرمانعا تولى. سيۋجەتتە اكەسى ۇلىن ۇرىستاردان اۋلاق ۇستاۋعا تىرىسىپ، جانى قالماي الىسادى»، - دەيدى Nomad Stunts حالىقارالىق كاسكادەرلەر توبىنىڭ جەتەكشىسى جايداربەك كۇنعوجينوۆ.
Nomad Stunts توبىنىڭ قۇرامىندا قازاقستاندىقتاردان باسقا قىرعىزستان، ءازىربايجان، تۇركيا، رەسەي، ۋكراينا، بولگاريا، گەرمانيا جانە اۆستريا ەلدەرىنىڭ كاسىپقوي ماماندارى بار. حالىقارالىق قۇرام «توقتاۋسىزدار-2»، «رونين»، «جابايى كونان»، «موڭعول»، «مۋلان»، «كوشپەندىلەر» جانە «توميريس» سىندى فيلمدەردەگى جۇمىستارىمەن كەڭىنەن تانىلدى. ولاردىڭ ورىنداۋىنداعى ەرەكشە ەكشن قويىلىمدار الەمدىك كينو ءوندىرىسى مايتالماندارى مەن سىنشىلارى تاراپىنان جوعارى باعاعا يە بولىپ ءجۇر. جاقىندا توپ مۇشەسى ءاليا ىسقاقوۆا كانادانىڭ بەدەلدى كينو جانە تەلەارنا اكادەمياسىنىڭ ارنايى جۇلدەسىن جەڭىپ الدى.
«ول كانادادا جۇمىس ىستەپ جۇرگەندە «كۋنگ-فۋ» اتتى سەريال كەيىپكەرىنە دۋبلەر بولۋ ۇسىنىسى تۇسكەن. ونىڭ جۇمىسى لايىقتى باعالاندى. وسىدان ەكى اپتا بۇرىن «ۇزدىك تريۋكتەر» جانە «ۇزدىك كاسكادەر» اتالىمدارى بويىنشا سىنعا ءتۇسىپ، ماراپاتقا يە بولدى»، - دەيدى Nomad Stunts حالىقارالىق كاسكادەرلەر توبىنىڭ جەتەكشىسى جايداربەك كۇنعوجينوۆ.
جاھاندىق دەڭگەيدە كەڭگە تانىلعان بلوكباستەرلەردە ەرەكشە ونەرلەرى جانە ءمىنسىز جۇمىستارى مەن الەمدى مويىنداتقان قازاقستاندىق ەكشن شەبەرلەرىنە ءىرى شەتەلدىك كينوكومپانيالاردان جانە اتاقتى رەجيسسەرلەر تاراپىنان ىنتىماقتاستىق جونىندە ۇسىنىستار ءجيى تۇسەدى. ماسەلەن، كەلەسى جىلى گوليۆۋدتىق جوباعا قاتىسۋ جوسپارلانعان. كاسكادەرلەر تاريحي، زاماناۋي كينو تۋىندىلاردىڭ كۇردەلى قويىلىمدارىندا اكتەرلەرگە دۋبلەر بولىپ، كورىنىسكە اسەر قوسىپ، جانداندىرا تۇسەدى.