وتاندىق IT سالاسىندا 20 مىڭنان استام جۇمىس ورنى اشىلدى

Astana Hub تەحنوپاركى وتاندىق IT سالاسىندا مامان دايارلاۋدى جالعاستىرىپ كەلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«Astana Hub – ورتالىق ازياداعى ەڭ ءىرى حالىقارالىق تەحنوپاركتەردىڭ ءبىرى. ونىڭ قىزمەتى IT بيزنەس ءۇشىن ەكوجۇيەنى قالىپتاستىرۋعا، IT تالانتتاردى قولداۋعا جانە ستارتاپ جوبالاردى دامىتۋعا باعىتتالعان. ءقازىر Astana Hub-تا 1 212 IT كومپانيا تىركەلگەن. ولارعا اقپاراتتىق-وقۋ، ماتەريالدىق ينفراقۇرىلىم، بيزنەستى دامىتۋ باعدارلامالارى، ارنايى سالىقتىق جانە ۆيزالىق ءتارتىپ تۇرعىسىنان قولداۋ كورسەتىلەدى. بۇگىنگى تاڭدا 7 مىڭنان اس ادام ءبىزدىڭ باعدارلامالارىمىزدان ءوتتى. Astana Hub قاتىسۋشىلارى IT سالاسىندا 20 مىڭنان استام جۇمىس ورنىن قۇردى»، - دەدى Astana Hub باسقارۋشى ديرەكتورى الينا ءابدىراحمانوۆا وكق-دە وتكەن بريفينگىدە.

حاب باسشىسىنىڭ ايتۋىنشا، جۇمىستىڭ نەگىزگى باعىتتارىنىڭ ءبىرى IT سالاسىنداعى قازاقستاندىق تالانتتار پۋلىن تولىقتىرۋعا باعىتتالعان.

«Astana Hub ءبىلىم باعدارلامالارىنىڭ قىزمەتى تەحنولوگيالىق كاسىپكەرلىكتى تانىمال ەتۋ جانە تەحنولوگيالىق ستارتاپ قۇرۋ ءۇشىن قاجەتتى داعدىلاردى وقىتۋ. سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ قولداۋىمەن ىسكە اسقان باعدارلامالاردىڭ، كۋرستار مەن ءىس-شارالاردىڭ نەگىزىندە Astana Hub ءبىلىم باعدارلامالارى كەڭسەسى IT ەكوجۇيەگە جاڭا تالانتتاردى تارتۋ، ستارتاپشىلار، فريلانسەرلەر مەن كاسىپكەرلەردىڭ قوعامداستىعىن دامىتۋعا قولايلى جاعداي جاسالعان»، - دەيدى ول.