بەكىرە بالىقتارىن باكتەريادان ەمدەيتىن انتيبيوتيك.
بيولوگيا جانە بيوتەحنولوگيا ماسەلەلەرى عىلىمي زەرتتەۋ ينسيتيتۋتىنىڭ ماماندارى وسىنداي جاڭالىق اشتى. الەمدىك سۇرانىسقا يە پرەپارات ءقازىر كلينيكالىق سىناقتان وتكىزىلىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.
«حيمەرلىك يندوليزين» دەپ اتالاتىن پرەپارات بالىقتاردىڭ اعزاسىنداعى ءقاۋىپتى باكتەريالاردى جويىپ قانا قويماي، ولاردىڭ ادام اعزاسىنا تارالۋىن شەكتەيدى ەكەن. بالىقتاردا كەڭىنەن تارالعان ءقاۋىپتى باكتەريالارمەن كۇرەستە ءتيىمدى انتيبيوتيك ۋنيۆەرسيتەت قابىرعاسىنداعى مىنا لابوراتوريادا جاسالعان. «حيمەرلىك يندوليزين» پرەپاراتى بالىقتاردىڭ اعزاسىنداعى باكتەريالار ۆيرۋسىنىڭ گەنومىنان جاسالعان.
«پرەپاراتقا باكتەريالاردا توزىمدىلىك ەشقاشان پايدا بولمايدى. ەكىنشىدەن ول بالىقتىڭ ەتى بولسىن نەمەسە جانۋاردىڭ ەتى بولسىن، سول ارقىلى ادامنىڭ اعزاسىنا جەتپەيدى. ول وتە از ۋاقىتتا جاڭا پاتوگەندەردى، اۋرۋ تۋعىزاتىن اسا ءقاۋىپتى پاتوگەندەردى 1 مينۋت، جارتى ساعاتتىڭ ىشىندە تولىعىمەن ولتىرەدى»، - دەيدى «بيولوگيا جانە بيوتەحنولوگيا ماسەلەلەرى» عزي ديرەكتورى امانگەلدى بيسەمبايەۆ.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، بۇگىندە سۋ جانۋالارىندا كەزدەسەتىن باكتەريالار قاراپايىم انتيبيوتيككە ءتوزىمدى بولىپ العان. ناتيجەسىندە ادام اعزاسىنا ءوتىپ، ءارتۇرلى اۋرۋلاردى قوزدىرىپ جاتىر. ال جاڭا پرەپاراتتىڭ ماقساتى – وسىنىڭ الدىن الۋ.
«ءبىز ءقازىر باكتەرياعا قارسى يندوليزين نەگىزىندەگى پرەپاراتتىڭ تيىمدىلىگىن تەكسەرىپ جاتىرمىز. بۇل عىلىمي جۇمىس 2019 جىلدان بەرى زەرتتەلىپ كەلەدى. وسى جاڭالىق اياسىندا مەن ءوزىمنىڭ PhD ديسسەرتاسيامدى قورعايمىن. وزگە مەملەكەتتىڭ عالىمدارى ءالى مۇنداي ناتيجەگە جەتكەن جوق»، - دەيدى گەنەتيكا ماماندىعىنىڭ دوكتورانتى سەرىك باكييەۆ.
وتاندىق عالىمدار ادام اعزاسىنا وتپەيتىن، باكتەرياعا ءتوزىمدى حيمەرلىك يندوليزين ءونىمىن ويلاپ تابۋمەن عانا شەكتەلمەگەن. پرەپاراتتى جەتىلدىرۋ ارقىلى تاسىمالداۋ جولىن دا تاۋىپتى. عالىمدار ەندى وسى انتيبيوتيكتى وزگە جانۋارلار مەن ادامدارعا سىناق جاساماق.