زياندى قالدىقسىز كالسييلەنگەن سودانى قالاي وندىرۋگە بولادى؟
قاراعاندىلىق عالىم مۇنىڭ تىڭ ءادىسىن ويلاپ تاپتى. قالقامان جۇماشيەۆ 8 جىل بويى اكتىڭ پايدالانىلۋىن قاجەت ەتپەيتىن جاڭا تەحنولوگيامەن اينالىسىپ كەلەدى، ياعني اۋاعا گازدار شىعارىلمايدى. ەنەرگيانى كوپ قاجەت ەتەتىن پروسەستەردى ازايتۋ ناتريي كاربوناتىنىڭ قۇنىن تومەندەتەدى، دەپ حابارلايدى Almaty-akshamy.kz
ازىرلەۋشى ءوز ءادىسىن پاتەنتتەپ، حالىقارالىق اۆتورلىق قۇقىعىن يەلەنگەن. قالقامان جۇماشيەۆتىڭ ادىسىنە قازىرگى كۇنى پاۆلودار قالاسىنىڭ ماماندارى قىزىعۋشىلىق تانىتۋدا. ولار پيلوتتىق سىناقتى وتكىزۋگە دايىن جانە ول وڭ ناتيجە كورسەتكەن جاعدايدا جۇمىس بارىسىنا ەنگىزەدى. ايتا كەتۋ كەرەك، كالسييلەنگەن سودا مەتاللۋرگيا ونەركاسىبىندە كەڭىنەن قولدانىلادى. قازاقستان جىل سايىن 400 مىڭ تونناعا جۋىق ءونىمدى قاجەت ەتەدى. اتالعان ۇنتاق بىزگە كورشىلەس ەلدەردەن يمپورتتالادى.
«ەسكى تەحنولوگيا بويىنشا وندىرىلگەن سودانىڭ ءاربىر تونناسىنا 10 تەكشە مەتر حلوريد ەرىتىندىسى شىعارىلادى. ءاربىر توننادان شامامەن ءبىر توننا سو2 بولىنەدى. ءقازىر بۇكىل الەم وسىمەن كۇرەسۋدە. ەكولوگتار ەسكى تەحنولوگياعا قارسى بولعاندىقتان، جاڭا، ەكولوگيالىق تازا ءادىستى ىزدەۋگە ۇمتىلىپ جاتىر. ۇسىنىلىپ وتىرعان تەحنولوگيا وسى تالاپتارعا تولىق جاۋاپ بەرەدى»، - دەيدى تەحنيكا عىلىمدارىنىڭ دوكتورى قالقامان جۇماشيەۆ.