الماتى قالاسى قوعامدىق دامۋ باسقارماسىنىڭ قوعامدىق دامۋ ورتالىعى بۇگىندە مەگاپوليسىمىزدەگى ستۋدەنتتەر مەن ەلگە تانىمال بىلىكتى ماماندار اراسىندا ءبىلىم مەن تاجىريبە الماسۋىنا جاعداي جاساپ، بولاشاق ماماندارعا قولداۋ كورسەتىپ، شابىت بەرۋ ءۇشىن بىرەگەي الاڭ قۇرىپ ۇلگەرگەن.
ناقتىراق ايتساق، ماسەلەن، 2023-2024 وقۋ جىلىندا الماتى ءسان جانە قىزمەت كورسەتۋ سالاسى كوللەدجى مەن وتاندىق تانىمال «Aida KaumeNOVA» برەندى اراسىندا مەموراندۋمعا قول قويىلىپ، ناتيجەسىندە اتالعان ءسان ۇيىندە 3-باعام «كيىم ديزاينەرى» 21-6 توبىنىڭ ستۋدەنتتەرى وندىرىستىك تاجىريبەدەن ءوتىپ، ەكى تۇلەك – توعجان سەيىتحان مەن ايشا باداق سوندا تۇراقتى جۇمىسقا قابىلدانعان بولاتىن. ال قازىرگى كەزدە 2-باعام «كيىم كونسترۋكتورى» 23-3 توبىنىڭ ءتورت ستۋدەنتى – ايزارا ءۋاليحانوۆا، التىن مايتىباي، سامال اسلانبەك جانە جاسمين تۇلكىباي وسى ءسان ۇيىندە وندىرىستىك پراكتيكادان ءوتىپ ءجۇر. جاقسى قىرىمەن كوزگە تۇسكەن جاعدايدا، كوللەدجدى بىتىرە سالىسىمەن ولار دا جۇمىسقا الىنادى.
ءيا، مەملەكەتتىڭ «جاستار تاجىريبەسى» جوباسى – جاستاردى قولداۋدىڭ نەگىزگى باعدارلامالارىنىڭ ءبىرى. بۇل جوبا وقىپ جۇرگەن قىز-جىگىتتەرگە ەرتەڭ بىتىرە سالىپ قايدا بارامىن دەپ تىعىرىققا تىرەلىپ قالماۋى ءۇشىن ولاردىڭ ەڭبەك نارىعىنداعى ورنىن ايقىنداپ بەرۋگە، قاجەتتى ەڭبەك داعدىلارىنا باۋلۋعا جانە باسەكەگە قابىلەتىن ارتتىرۋعا باعىتتالعان.
قوعامدىق دامۋ ورتالىعىنىڭ باسشىلىعى كەشە تاعى ءبىر مەموراندۋمنىڭ رەسمي قابىلدانۋىنا مۇرىندىق بولدى. بۇل جولى «Aida Kaumenova Fashion» ءسان ءۇيى مەن الماتى تەحنولوگيالىق-ەكونوميكالىق كوللەدجى اراسىندا ىنتىماقتاستىق تۋرالى كەلىسىمگە قول قويىلدى. بۇل كوللەدج ستۋدەنتتەرى دە تانىمال ديزاينەر ايدا كاۋمەنوۆانىڭ ءدارىسىن تىڭداپ، تاجىريبەسىنەن ءبىلىم ءتۇيىپ، تاڭداعان ماماندىعىنىڭ قىر-سىرىن مەڭگەرۋ مۇمكىندىگىنە يە بولدى. ياعني، شىعارماشىل جاستار دۋالدى جۇيە بويىنشا تەوريانى پراكتيكامەن ۇشتاستىرىپ، ەكى جاقتى دا قاتار الىپ جۇرمەك.
رەسمي راسىمنەن كەيىن الماتى تەحنولوگيالىق-ەكونوميكالىق كوللەدجى ستۋدەنتتەرى وزدەرىنىڭ بالاڭ شىعارمالارىن، ياعني قولىنان، ينەدەن ەندى شىققان كيىمدەرىن تانىستىردى. ينە-جىپكە جاقىن جاستار تىككەن توپتامالاردا ۇلتتىق ناقىشتاردىڭ باسىم ەكەنىن بايقادىق. ولار قازاقتىڭ تاريحى مەن ءداستۇرىن بۇگىنگى زاماناۋي سانمەن ۇشتاستىرا بىلگەن. ءاربىر جارقىن كيىمنەن ستۋدەنتتەردىڭ ىزدەنىسى مەن جاڭاشىلدىعىن كوردىك. الەمدى ادەمى كيىندىرۋگە تالپىنعان جاستارعا ساتتىلىك تىلەدىك.
– مىنە، بۇگىن تاعى ءبىر مەموراندۋمعا قول قويىلدى. بۇل سەرىكتەستىك وتاندىق شىعارماشىلىق يندۋستريانى دامىتۋ مەن بولاشاق مامانداردى قولداۋ بارىسىنداعى ماڭىزدى قادام دەپ سانايمىز. وقۋ – بولەك، ال سول وقىعانىڭىزدى تاجىريبەمەن ۇشتاستىرۋ – ەكىنشى الەم. سوندىقتان ءبىز ستۋدەنتتەر مەن كاسىپورىندار اراسىنا التىن كوپىر ورناتىپ، ەكى جاقتى جاقىنداستىرىپ، جاستاردىڭ جۇمىسقا ورنالاسىپ كەتۋىنە جاعداي جاساۋدى ماقسات ەتتىك. ەندى بۇل كوللەدج ستۋدەنتتەرى دە ايدا كاۋمەنوۆانىڭ تانىمال ءسان ۇيىندە ەسكيز جاساۋدان باستاپ، دايىن كيىم تىگىپ شىعارعانعا دەيىنگى پروسەستى ۇيرەنۋىنە مۇمكىندىگى بار. وسى ارقىلى ءسان الەمىنە جاڭا تىنىس بەرىپ، شىعارماشىل تالانتتى جاستارعا داڭعىل جول كورسەتىپ بەرەتىن بولامىز، – دەيدى قوعامدىق دامۋ ورتالىعىنىڭ عىلىمي جانە ءبىلىم بەرۋ سالاسىمەن ءوزارا ارەكەتتەسۋ ءبولىمى باسشىسى باقىتگۇل قاسىمەتوۆا.