وتاندىق دارىگەرلەر جوعارى راديواكتيۆتى ساۋلەلەرمەن ەم جاساۋدا.
گامما-پىشاق قۇرىلعىسى ارقىلى ءبىر جىلدا 400-دەن استام ناۋقاس ەم-دوم الىپ شىققان. قۇرىلعى ميداعى ىسىكتى ساۋلەمەن ەمدەيدى. ياعني باس سۇيەكتى اشۋدى قاجەت ەتپەيدى. وتاندىق نەيروحيرۋرگتەر وسى ارقىلى ميدىڭ وتە قيىن قۋىسىندا پايدا بولعان ىسىكتى ەش قيىندىقسىز الىپ تاستاي الادى، دەپ حابارلايدى Almaty-akshamy.kz 24.kz-كە سىلتەمە جاساپ.
پاۆەل شۆەدسوۆ ءبىر جىل بۇرىنعى جاعدايىن قايتا ەسكە تۇسىرگىسى كەلمەيدى. باسىنىڭ اۋىرعانىنا ءمان بەرمەي جۇرگەندە، ءبىر كۇنى تالىپ قۇلاعان. ميىندا ىسىك پايدا بولعانىن ەستىگەندە، بىردەن نەيروحيرۋرگيا ورتالىعىنىڭ ماماندارىنا جۇگىنىپتى. وعان گامما-پىشاقپەن ەم جاسالعان. ءقازىر قال-احۋالى جاقسارىپ، كولىكتى دە ءوزى جۇرگىزەدى.
"مەن بۇرىن باسىم اينالىپ، جۇرە الماي قالدىم. گامما-پىشاقپەن ەش قيىندىقسىز ەمدەلىپ شىقتىم. ەم جاسالعان كۇنى اياققا تۇردىم. الايدا ميداعى ىسىك بۇرشىكتەرى بىرنەشەۋ بولعاندىقتان، بۇگىن تاعى تەكسەرىلۋگە كەلدىم"، - دەيدى قالا تۇعىنى پاۆەل شۆەدسوۆ.
راديوحيرۋرگيالىق قوندىرعى مي ىسىگىمەن قاتار، تامىرلى جانە فۋنكسيونالدى اۋرۋلاردى ەمدەي الادى. اپپاراتتاعى گامما ساۋلەسى دارىگەر بەلگىلەگەن ىسىك وشاعىنا باعىتتالادى. ال ناۋقاس ەشقانداي اۋىرسىنۋدى سەزبەيدى.
حيرۋرگيالىق اشىق وپەراسيالاردى الماستىراتىن اپپاراتپەن بۇگىنگە دەيىن 400-دەن استام ادام ەم العان. ورتالىق ازيادا تەك ءبىزدىڭ ەلدە عانا بولعاندىقتان، كورشى ەلدەن كەلەتىن ناۋقاستار بار. قازاقستان ازاماتتارىنا بۇل قۇرىلعىمەن ەم-دوم تەگىن جاسالادى. نەيروحيرۋرگتاردىڭ قولى جەتپەيتىن، وتە كۇردەلى جەردە ورنالاسقان ىسىكتەردى وسى قۇرالدىڭ كومەگىمەن جويۋعا بولادى، – دەيدى مامان.
"كەيبىر ناۋقاستىڭ ميىندا بىرنەشە ىسىك بولۋى مۇمكىن. ولاردى دا ءبىر مەزەتتە كوپ بولسا، ەكىگە ءبولىپ، اراسىن 3-6 ايعا ءبولىپ ەم جۇرگىزۋىمىز مۇمكىن. بۇنىڭ ارتىقشىلىعى تەك پوتولوگيالىق وشاقتى ساۋلەلەندىرەدى. باس ميى ودان تىس قالادى. ناۋقاستار كوبىندە بىزدە مۇنداي اپپارات بارىن بىلە بەرمەيدى. شەتەلگە باراتىندار بار"، - دەيدى نەيروحيرۋرگ دارىگەر نۇرزات سىعاي.
قازاقستان وسىنداي جوعارى تەحنولوگيالىق جابدىعى بار تمد اۋماعىنداعى ءۇشىنشى ەل. جالپى، الەمدە 400-دەن استام گامما-پىشاق قوندىرعىسى بار، ولاردىڭ جارتىسى اقش پەن جاپونيادا ورنالاسقان. سوندىقتان وتاندىق دارىگەرلەر الداعى ۋاقىتتا گامما-پىشاقتىڭ قولدانىس اياسىن كەڭەيتىپ، ءتۇرلى اۋرۋلاردى ەمدەۋدى جوسپارلاپ وتىر.