جۋرناليستەر قازاقستاندىق قۇندىلىقتار اينالاسىندا ۇلتتى بىرىكتىرۋدە اسا ماڭىزدى ميسسيانى ورىنداپ كەلەدى. بۇل تۋرالى قازاقستان حالقى اسسامبلەياسىنىڭ كەزەكتى وتىز ءبىرىنشى سەسسياسىندا پرەزيدەنت قاسىم-جومارت توقايەۆ ءمالىم ەتتى، دەپ حابارلايدى اlmaty-akshamy.kz.
«وتاندىق بۇقارالىق اقپارات قۇرالدارىنىڭ ماقساتى ەلىمىزدەگى جانە الەمدەگى جاعداي تۋرالى وتانداستارعا بەيتاراپ ءارى جەدەل اقپارات تاراتۋمەن بايلانىستى. ءبىزدىڭ تىلشىلەر قازاقستاندىق قۇندىلىقتار اينالاسىندا ۇلتتى بىرىكتىرۋ، ءبىزدىڭ مەملەكەتتىلىك پەن حالىقتىڭ بىرلىگىن نىعايتۋ بويىنشا اسا ماڭىزدى ميسسيانى ورىنداپ كەلەدى»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، ۇلتتىق بىرلىككە نۇقسان كەلتىرۋ ماقساتىن كوزدەيتىن ارنايى باعىت بار. وسى ورايدا قازاقستان حالقى بۇل ماسەلەدە ساقتىق تانىتىپ، ارانداتۋدىڭ شىرماۋىنا ءتۇسىپ قالماعانى ماڭىزدى.
«قازاقستاندا جالپى باسپا ءسوز باسىلىمدارى، راديو، تەلەارنالار ەتنوسارالىق قاتىناستار سالاسىندا وبەكتيۆتى حابار تاراتادى. الايدا الەمدەگى سوڭعى وقيعالار اقپاراتتىق تۇرعىدا ءبىزدىڭ قوعامدى كەيدە باعىتتان اداستىرىپ جاتاتىنىن كورىپ ءجۇرمىز. ەلىمىزدىڭ ءار ازاماتى جاريا الاڭعا كىرگەندە ءبىزدىڭ ۇلتتىق مۇددەنى باسشىلىققا الۋى كەرەك»، - دەدى مەملەكەت باسشىسى.