بىلىمدىگە دۇنيە جارىق
قازاقستاندىق جاس عالىم جانات ماحاتايەۆا امەريكالىق ءىرى IT-الپاۋىتتىڭ بەدەلدى ستيپەندياسىن جەڭىپ الدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ
نازاربايەۆ ۋنيۆەرسيتەتىنىڭ «اقىلدى» جۇيەلەر جانە جاساندى ينتەللەكت ينستيتۋتىنىڭ عىلىمي قىزمەتكەرى دەمەنسيا نەمەسە السگەيمەر اۋرۋى بار ادامدارعا كومەكتەسەتىن «جاد اسسيستەنتى» اتالاتىن بىرەگەي قوسىمشا ازىرلەدى.
ءوز تۋىندىسىن دايىنداۋدا مامان وبەكتىلەردى تانۋ جانە پايدالانۋشىلاردىڭ ورنالاسقان جەرىن انىقتاۋ ءۇشىن كومپيۋتەرلىك كورۋ الگوريتمدەرىن قولدانعان.
ەندى جاناتتىڭ زەرتتەۋى 15 مىڭ دوللار قارجىلىق قولداۋعا يە بولادى جانە شەتەلدەگى جەتەكشى كومپيۋتەرلىك زەرتحانالاردا 12 اپتالىق تاجىريبەدەن وتەدى.
عالىم ستيپەنديانىڭ قازاقستانداعى العاشقى يەگەرى ەكەنىن ايتا كەتكەن ءجون.
«ادام بەلگىلى ءبىر عيماراتقا كىرگەندە اتالمىش باعدارلاما ونىڭ قايدا بارعانىن، قانداي نىسانداردى ارالاعانىن ەستە ساقتايدى. وسىلايشا ادامعا ىس-ارەكەتتەرىن ەسكە ساقتاۋدىڭ قاجەتى جوق، سەبەبى جۇيە ونىڭ جادى سەكىلدى بارلىق اقپاراتتى وزىندە ساقتايدى. وتكەن جىلى ءبىز جاساعان زەرتتەۋلەرگە شولۋ بارىسىندا كورۋ قابىلەتى بۇزىلعان جانە تۇستەردى، ادامنىڭ ءتۇر كەلبەتىن، داۋىستاردى اجىراتا المايتىن ادامداردىڭ كوپ ەكەنى انىقتالدى. بۇل زاماناۋي تەحنولوگيانى وسى ماسەلەلەردى شەشۋ ءۇشىن قولدانادى. الەمدە عالىمدار بۇل ماسەلەمەن اينالىسپاعاندىقتان، مەنىڭ زەرتتەۋىمە «Microsoft» كومانداسى قىزىعىپ وتىر» - دەدى نازاربايەۆ ۋنيۆەرسيتەتىنىڭ دوكتورانتى جانات ماحاتايەۆا.