وتانداستارىمىز ەت جانە ءسۇت ونىمدەرىن كوبىرەك تۇتىنا باستاپتى

نەگىزى بۇرىن دا سولاي بولعان. ءسىرا، بۇل ءبىزدىڭ گەنىمىزگە بايلانىستى.

مۇنداي پىكىردى تاعامتانۋشى-عالىم ت.شارمانوۆتىڭ اۋزىنان تالاي ەستىگەنبىز. بۇل تۋرالى ۇلتتىق ستاتيستيكا بيۋروسىنىڭ ءۇشىنشى توقسانداعى قورىتىندىسىندا ايتىلعان، دەپ حابارلايدى اlmaty-akshamy.kz 

تۇرعىندار ەت جانە ەت ونىمدەرىنە تابىسىنىڭ – 17%-ىن، نان جانە جارما ونىمدەرىنە  – 7،8%، ءسۇت ونىمدەرىنە – 5،4%-ىن جۇمسايدى.

ستاتيستيكتەردىڭ پىكىرىنشە، جەتىسۋ، اتىراۋ، اقمولا وبلىستارىنىڭ تۇرعىندارى ەت پەن ەت ونىمدەرىن ەڭ كوپ تۇتىناتىن ايماققا جاتادى. ەڭ از ەت جەيتىندەر شىمكەنتتىكتەر. ەسەسىنە ولار «نان سوعار» ەكەن. ستاتبيۋرو وڭىرلەر بويىنشا نان جانە جارما ونىمدەرىن تۇركىستان وبلىسىنىڭ تۇرعىندارى كوپ تۇتىنعانىن جازادى. جان باسىنا شاققاندا ولار 44،1 كەلى (توقسانىنا) تۇتىنسا، ال استانا تۇرعىندارى  بۇل ونىمدەردى از الادى، جان باسىنا شاققاندا 23،6 كەلىدەن كەلەدى. بۇعان كليماتتىڭ دا اسەرى بار ەكەنى انىق. ويتكەنى، وڭتۇستىك وڭىردە كۇن جىلى بولعاندىقتان، بۇل جاقتىڭ حالقى كوكونىستى كوبىرەك تۇتىنادى. ال سۋىق ءوڭىر تۇرعىندارى -30-40 گرادۋستا ەت جەمەسە، «ءومىرى قيىندايدى». سونىمەن، وتكەن جىلدىڭ سايكەس كەزەڭىمەن سالىستىرعاندا، 2023 جىلدىڭ ءۇشىنشى توقسانىندا قازاقستاندىقتار ەت پەن ەت ونىمدەرىن – 0،7 كەلىگە، ءسۇت پەن ءسۇت ونىمدەرىن – 1،2 كەلىگە كوپ تۇتىنا باستاعان.